Janë zbuluar detaje të reja nga dëshmia e Ragip Gilës, i arrestuar si autor i dyshuar i ngjarjes së rëndë në Shkodër, ku humbën jetën Armando Pali dhe Liridon Kraja, ndërsa u plagosën Erogen Vaso dhe kamarierja Meri Kaceri.
“Objektivi im ishte vetëm Erogen Vaso, për shkak të një problemi personal me të. Erogeni më ka kërcënuar dhe kemi pasur probleme. Sillet si i fortë dhe më ka çuar fjalë. Konflikti ka qenë vetëm me të dhe unë doja të qëlloja vetëm atë”, ka deklaruar Gila para oficerëve hetimorë, sipas korrespondentit të Top Channel, Klodian Zhivani.
Pas atentatit, 30-vjeçari tentoi t’i shpëtonte policisë, por u rrëzua nga një lartësi pranë shinave të trenit, në shtratin e lumit Kir, duke dëmtuar këmbën. Në momentin e kapjes, policia i bëri thirrje të dorëzohej dhe të hidhte armën. “E kam hedhur armën, jam dorëzuar, më dhemb shumë këmba”, mësohet të jetë përgjigjur ai, pak para se të vihej në pranga.
Megjithatë, hetuesit po e trajtojnë me rezervë versionin e dhënë nga i arrestuari dhe po verifikojnë nëse pas ngjarjes që tronditi qytetin fshihen persona të tjerë që mund ta kenë porositur për të goditur Erogen Vason, 43 vjeç, i cili ndodhet nën kujdes mjekësor në Spitalin Ushtarak në Tiranë.
