Shkëlzen Velaj mbeti i vrarë, dje në orët e para të mëngjesit në qytetin e Vlorës. Detaje të reja kanë dalë në dritë lidhur me ngjarjen e rëndë që tronditi banorët e Vlorës pak pas mesnate. Mësohet se pasi vuri re se po ndiqej nga atentatorët, 35-vjeçari ka dalë me vrap nga makina dhe nxitoi të ngjitej me vrap në shkallët e pallatit, por atentatori nuk është ndalur dhe e ka ndjekur nga pas duke e qëlluar me breshëri automatiku në derë të shtëpisë.
Plumbat në drejtim të 35-vjeçarit kanë qenë nga një distancë e afërt. Në trupin e Velaj është lëshuar një karikator automatiku, të cilat i kanë kushtuar jetën. Ndërkohë, një nga fqinjët e viktimës ka folur për A2 duke bërë të ditur se nëna e gjeti djalin të vdekur pas derës.
“Unë jam fqinje. Atje isha mbrëmë. E mori vesh edhe e ëma, por i thanë pas orës 02:30. Djali i kishte kërkuar të hapte derën. Ajo tha se kishte shkuar, por nuk e kishte hapur dot derën, ndërsa kishte dëgjuar zhurma. Kur kishte hapur derën e kishte gjetur djalin të vrarë”, u shpreh një fqinje e viktimës.
“Djali nuk kishte asnjë problem këtu. Madje, ai interesohej edhe për shtrimin e rrugëve. Ai e ka shtruar rrugën tonë, duke paguar vetë. Ishte një njeri shumë i rregullt për ne. Grua më të mirë nuk gjen në botë se sa e ëma e tij”, shprehet një tjetër fqinj.
