Një ngjarje e rëndë ka tronditur zonën e Madheshit në Ulëz të Matit, ku një 23-vjeçar është gjetur i pajetë pranë liqenit të Shkopetit.
Trupi i të riut, Renis Dobra, është zbuluar nga një banor i zonës në një pjesë të pyllëzuar dhe të izoluar pranë ujërave të liqenit, ndërsa automjeti i tij dyshohet se ka përfunduar në ujë pas ngjarjes.
Mbrëmjen e kaluar, babai i viktimës kishte denoncuar në polici zhdukjen e të birit, duke deklaruar se e kishin marrë peng.
Policia nisën menjëherë kërkimet, dhe pas disa orësh kontroll në terren, gjetën trupin pranë liqenit, vetëm pak metra larg makinës së zhdukur.
Në trupin e 23-vjeçarit janë konstatuar shenja të dukshme dhune, përfshirë mavijosje në qafë dhe plagë nga një shenjë plumbi, që shtojnë dyshimet se ai është mbytur fillimisht me litar dhe më pas është hedhur në zonën e Shkopetit për të fshehur krimin.
Këto dyshime kanë ngritur dy pista kryesore hetimore, e para lidhet me një konflikt për shkak të parcelave të kultivuara me kanabis, dhe e dyta për motive xhelozie ose lidhje sentimentale.
Burimet nga vendngjarja theksojnë se Dobra udhëtonte me makinë kur dyshohet se ka pasur një sulm me armë zjarri nga persona ende të paidentifikuar, pasi banorët raportuan dëgjimin e të shtënave në zonë.
Renis Dobra nuk kishte precedentë të rënda kriminale, vetëm disa raste të vogla vjedhjesh, dhe as ai dhe babai i tij nuk rezultojnë me probleme penale të mëdha.
Për ngjarjen është ngritur një grup i posaçëm hetimor, ndërsa Prokuroria e Matit po vijon hetimet për zbardhjen e plotë të rrethanave.
Banorët e zonës shprehin shqetësim për sigurinë dhe kërkojnë drejtësi, ndërsa familja e viktimës është në një gjendje të rëndë emocionale.
