Një mëngjes i rëndë ka mbuluar shkollën industriale në Vlorë, aty ku zakonisht dëgjohet zhurma e nxënësve, por këtë të hënë vendin e saj e zunë heshtja, lotët dhe trishtimi.
Në ambientet përreth dhe në vendin ku ndodhi aksidenti fatal, familjarë, miq dhe shokë të dy viktimave, Luan Llanaj 19 vjeç dhe një tjetër nxënës 16-vjeçar, kanë vendosur buqeta me lule, qirinj dhe një çelës servisi, një simbol prekje për kujtimin e tyre.
Të rinjtë, të pikëlluar dhe të tronditur nga humbja, përqafohen, qajnë dhe qëndrojnë të heshtur përpara vendit ku ndodhi përplasja fatale.
“Na dhemb shpirti… nuk e besojmë që nuk do t’i shohim më,” shprehet një prej shokëve të klasës, me sytë e skuqur nga lotët. “Ishim gjithmonë bashkë, në klasë, në jetë.”
Aksidenti ndodhi më 1 qershor, rreth orës 13:40, në zonën e quajtur “Pusi i Mezinit”, në aksin rrugor Vlorë-Fier, pranë një karburanti në rrugën “Demokracia”.
Sipas të dhënave paraprake, i riu që drejtonte motorin humbi kontrollin, duke u përplasur fillimisht me një shtyllë elektrike e më pas me një tjetër prej druri. Përplasja rezultoi fatale për të dy.
Njëri prej tyre jetonte vetëm me nënën dhe punonte për të mbajtur familjen, ndërsa të dy ishin miq të mirë që ndanin bashkë punën dhe jetën e përditshme.
