Rritja e rasteve të reja të infektuara me koronavirus në Kosovë po bëhet gjithnjë e më shumë problematike duke shkaktuar kështu panik dhe frikë tek qytetarët por edhe tek shtetet e tjera. Shtimi i numrit ditë pas dite rrezikon në përhapjen e varianteve të reja të Covid-19. Masat kufizuese të vendosura siç duket nuk po japin aspak rezultat duke arritur kështu shifra alarmante.
Por kjo situatë ka ngjallur dhe reagimin e Shteteve të Bashkuara të Amerikës duke e vendosur Kosovën në listën e vendeve më rrezikshmëri të lartë.
Siç shkruan dhe New York Times, SHBA u bën apel shtetasve amerikanë që të bëjnë kujdes me udhëtimet drejt këtyre vendeve në mënyrë që ti shmangin ose të sigurohen që janë të vaksinuar nëse duan që të shkojnë në ndonjërin prej tyre.
Aktualisht Kosova ka 21 mijë e 922 raste aktive me COVID-19, derisa brenda 48 orëve të fundit kanë vdekur 30 persona. Vendi gjendet nën regjimin e disa masave anti-COVID, ku janë ndaluar dasmat, janë mbuyllur klubet e natës dhe është shkurtuar orari i gastronomisë.
E ndërkohë Instituti i Shëndetësisë Publike në Kosovë para tre ditësh përmes një njoftimi për media kishte konstatuar se Kosova ka arritur që t’ia ndalë ritmin variantit të ri të COVID-19, variantit Delta, edhe përkundër vdekjeve të shumta dhe rritjes enorme të rasteve të reja të infektimit me virus.
“Qytetarë të dashur! Delta variantit ia kemi ndalë turrin edhe pse akoma po raportohen shumë raste pozitive dhe shumë vdekje duke shprehur ngushëllime për të gjithë familjarët! Virusi bartet shumë shpejt prej një personi në dhjetëra persona tjerë me pasoja që në të shumtën e rasteve mund të jenë fatale e që fatkeqësisht preken edhe fëmijët”, thuhej në njoftimin e IKSHP-së të datës 22 gusht.
