Një tragjedi ajrore ka goditur Indinë, pasi një avion Boeing 787 Dreamliner i kompanisë Air India, me destinacion Londrën, u rrëzua pak sekonda pas ngritjes nga aeroporti i Ahmedabadit, në shtetin veriperëndimor Gujarat.
Deri më tani, 279 persona janë konfirmuar të vdekur, duke e renditur këtë si një nga aksidentet më të rënda ajrore të këtij shekulli.
Sipas burimeve policore, trupat e 279 viktimave janë transportuar drejt spitalit të qytetit për identifikim, proces i cili po bëhet edhe më i ndërlikuar për shkak të dëmtimeve të rënda.
Vetëm një pasagjer ka mbijetuar, një shtetas britanik me origjinë indiane, i cili ndodhej në pjesën e përparme të avionit në momentin e përplasjes. Ai është nxjerrë i plagosur nga rrënojat dhe po trajtohet në spital.
Fluturimi AI171 u ngrit nga pista në orën 13:19 me orën lokale, por pak çaste më vonë pilotët lëshuan një sinjal emergjence.
Avioni humbi lartësinë me shpejtësi dhe u rrëzua mbi një kompleks banimi pranë aeroportit, ku jetonin mjekë, studentë të mjekësisë dhe familjet e tyre. Përplasja shkaktoi shkatërrim të plotë në zonë dhe zjarre të mëdha.
Në bord ndodheshin 230 pasagjerë (169 indianë, 53 britanikë, 7 portugezë, 1 kanadez) dhe 12 anëtarë ekuipazhi. Autoritetet indiane të aviacionit kanë nisur një hetim të thelluar për të zbuluar shkaqet e rrëzimit.
Deri tani është gjetur njëra nga dy kutitë e zeza të avionit, konkretisht regjistruesi i të dhënave të fluturimit, ndërsa kërkimet për regjistruesin e zërit në kabinën e pilotit janë ende në vazhdim.
Ministri i Brendshëm i Indisë, Amit Shah, ka deklaruar se raporti përfundimtar i hetimit nuk do të publikohet deri në përfundimin e analizave të ADN-së, të cilat janë të domosdoshme për të identifikuar viktimat, për shkak të shkallës së lartë të djegies dhe fragmentimit.
Ky aksident konsiderohet si një ndër më të rëndët në historinë moderne të aviacionit civil, duke rikthyer vëmendjen ndërkombëtare mbi sigurinë e fluturimeve dhe mbi standardet e mirëmbajtjes së avionëve të linjës.
