Procesi i numërimit të votave ka vijuar me intensitet gjatë natës në të gjithë vendin, ndërsa në disa qarqe ka nisur edhe numërimi i votave preferenciale për kandidatët në listat e hapura.
Sipas përditësimit të fundit të KQZ-së, në orën 07:10 të mëngjesit, janë numëruar 4,907 nga gjithsej 5,225 qendra votimi.
Deri në këtë fazë të numërimit, Partia Socialiste kryeson me 52.13% të votave, duke siguruar 82 mandate, të mjaftueshme për të formuar e vetme shumicën parlamentare.
Koalicioni PD Aleanca për Shqipërinë Madhështore renditet i dyti me 34.45% të votave, që përkthehet në rreth 52 mandate.
Ndërkohë, disa nga partitë e tjera kanë arritur të afrohen apo të kalojnë pragun përfaqësues:
• Nisma Shqipëria Bëhet (NISMA-SHB): 3.50%
• Partia Socialdemokrate (PSD): 3.47%
• Partia Mundësia: 2.95%
Partitë më të vogla si Lëvizja Bashkë, Koalicioni Euroatlantik (KEA), Aleanca Kombëtare Shqiptare (AKSH), Aleanca Demokracia e Re (ADR) dhe të tjera nuk kanë arritur të kalojnë pragun, me më pak se 2% të votave secila.
Në qarqet Durrës, Fier dhe Tiranë vijon ende numërimi për disa kuti, ndërsa në pjesën më të madhe të vendit procesi ka përfunduar.
Deri tani, ndarja e mandateve është si më poshtë:
• Partia Socialiste: 82 mandate
• Partia Demokratike: 52 mandate
• Partia Socialdemokrate (PSD): 3 mandate
• Nisma Shqipëria Bëhet (NISMA-SHB): 1 mandat
• Partia Mundësia: 1 mandat
• Lëvizja Bashkë: 1 mandat
