PS dhe PD nuk bien dakord për zonat elektorale ku do të bëhet numërimi elektronik i votave. Dy partitë kanë dorëzuar në KQZ propozimet e tyre se ku duhet të realizohet votimi dhe numërimi elektronik në zgjedhjet e 25 prillit.
Për të vetmen zonë që të dyja palët e shohin si të sigurt për këtë proces është qyteti i Korçës. Përveç Korçës demokratët kanë sugjeruar dhe qarkun e Fierit ndërsa socialistët disa njësi administrative në Tiranë.
PS nuk është dakord që ky projekt pilot të implementohet në Fier, por kërkojnë të realizohet në disa zona urbane në Tiranë dhe jo rurale për shkak të infrastrukturës dhe internetit, në mënyrë që procesi të mos ketë kontestime. Sa i përket zonave në Tiranë, socialistët zgjedhjen ia ka lënë në dorë Komisionit Qendror të Zgjedhjeve. Propozimet e PD mbajnë firmën e sekretarit të Përgjithshëm, Gazment Bardhi ndërsa PS ka zgjedhur përfaqësuesin ligjor, Eridian Salianjin.
PD zgjedh Fierin dhe Korçën
Në propozimin e PD-së ndër tëe tjera theksohet: “Z. Komisioner, në përgjigje të shkresës suaj nr. 2646 prot., datë 28.12.2020, mbi zbatimin e teknologjisë në zgjedhjet e datës 25 prill 2021 për Kuvendin e Shqipërisë, ju bëjmë me dije se opinioni i Partisë Demokratike është që projekti pilot për votimin dhe numërimin elektronik të realizohet në qarqet Fier dhe Korçë”.
PS zgjedh Tiranën dhe Korçën
Në përgjigjen e Partisë Socialiste shkruhet ndër të tjera: “Në përgjigje të kërkesës suaj me numër 2648 prot dt 18/12/2020 “mbi zbatimin e teknologjisë në zgjedhje të datës 25.04.2021 për Kuvendin e Shqipërisë bazuar në ligjin nr, 10019 dt 29.12.2002 Kodi Zgjedhor i Republikës së Shqipërisë i ndryshuar neni 22 “Kompetencat e KQZ-së lidhur me teknologjinë në zgjedhje në bazë të së cilit institucioni i KQZ-së ka kompetencë të eksplorojë, eksperimentojë dhe të vendosë përdorimin në zgjedhje të sistemeve dhe/ose pajisjeve të teknologjisë së informacionit për të mbuluar aspekte dhe/ose procedura të veçanta të procesit zgjedhor, ta zbatojë në zgjedhje nëpërmjet projekteve pilot, në jo më pak se 10% të numrit të zgjedhjeve për çdo fazë të implementimit. si dhe nenit 179 “Prokurimi i sistemeve apo pajisjeve të teknologjisë së informacionit”, ku sistemet apo pajisjet e teknologjisë së informacionit, që do të përdoren ne zgjedhje do të implementohen në projekte pilot, bazuar në kërkesën tuaj mbi propozimet nga subjektet politike, për bashkitë ku mund të vihet në zbatim për projektin pilot për votim elektronik, ne subjekt politik Partia Socialiste e Shqipërisë propozojmë Bashkitë si më poshtë: Bashkia Korçë dhe Bashkia Tiranë, në disa prej Njësive Administrative të kësaj Bashkia, të cilat përzgjidhen sipas vlerësimit tuaj si institucion”.
Vendimi përfundimtar për zonat ku do implementohet votimi dhe numërimi elektronik do merret nga Komisioni Qendror i Zgjedhjeve.
/Gazetareforma.com/
