Elton Debreshi është minatory që do të kandidojë i pavarur për deputet në qarkun e Dibrës. I ftuar mbrëmjen e djeshme në Euronews ai është shprehur se kandidimi i tij vjen për të zgjidhur problemet që për 30 vite me radhë partitë politike i kanë shkaktuar Bulqizës.
“Ne kandidojmë për hallet dhe problemet tona. Jemi të zhgënjyer për 30 vite nga partitë politike dhe nga sindikatat. Deputetët kanë menduar se e si ti marrin Bulqizës, malin, pyjet, lumenjtë dhe mineralet. Nuk e kam synimin për deputet por te hallet dhe problematikat që kemi në Bulqizë”, u shpreh Debreshi.
Minatori gjithashtu ka thënë se nuk do të qëndrojë në Tiranë për të ngrënë dreka e darka e për t’u kollarisur, por do të jetë çdo ditë në Bulqizë me problemet që ajo zonë ka.
“Nuk do të qëndroj në Tiranë të ha dreka e darka e të kollarisem. Nuk do shitemi për asnjë lloj çmimi. Unë do jem çdo ditë në Bulqizë me hallet dhe problemet që ka atje.”
Ai ka folur edhe për vendimin për të kandiduar duke thënë se ka qenë një propozim i ardhur nga minatorët që e shohin si shpresë që zëri i tyrë të dëgjohet. Debreshi u shpreh se synimi i tyre është miratimi i statusit të minatorit për të cilin Sindikata e Minatorëv etë Bashkuar të Bulqizës bëri edhe një peticion ku u mblodhën më shumë se 10 mijë firma.
“Kandidimi nuk ka ardhur nga ana ime por nga ana e minatorëve pasi e shohin si e vetmja shpresë që të dëgjohet zëri dhe problematikat e punëtorëve.Synimi ynë është statusi i minatorit që po zvarritet prej 30 vitesh. Statusi është shpresa e vetme për minatorin që të lërë diçka pas, qoftë i aksidentuar qoftë humbje jete”, tha Debreshi.
