Në qytetin e Fierit, prej tre ditësh nuk vijon procesi i vaksinimit, pasi mungojnë dozat e vaksinave. “ABC News” raporton se akoma nuk ka një përgjigje në lidhje me këtë vonesë të vaksinave. Ndërkohë, qytetarët që ndodhen në ambientet e hapura për të marrë dozën e vaksinës, theksojnë se vijojnë të qëndrojnë në pritje, por nuk kanë marrë asnjë përgjigje deri më tani.
“Na kanë thirrur për vaksinat, kemi ardhur për të shoqëruar prindërit, po rrimë në pritje, por nuk kemi asnjë informacion në lidhje me këtë”, ka thënë një qytetare.
“Vijmë lart e poshtë prej 2-3 ditësh dhe nuk ka vaksina”, është shprehur një tjetër qytetare.
Ndërkohë, një banor thekson se ka kaluar 24 ditë nga doza e parë e marrjes së vaksinës dhe pret që të marrë dozën tjetër, por akoma duket se është pa përgjigje për këtë fakt. “Më duhet ta bëj patjetër vaksinën, kam bërë dozën e parë para 24 ditësh dhe kam të dytën. E kalova shumë mirë dozën e parë nuk kisha asnjë shenjë”.
Procesi i vaksinimit në Shqipëri ka nisur prej disa ditësh tashmë dhe siç raporton qeveria shqiptare, po vaksinohen mesatarisht 12 mijë persona në ditë. Gjithashtu, si Edi Rama, ashtu dhe ministrja e shëndetësisë, Ogerta Manastirliu, kanë deklaruar se pas 14 muajsh, do jetë vaksinuar e gjithë popullata.
