Gjykata e Durrësit ka vendosur pezullimin nga detyra të drejtorit të Arsimit Parauniversitar, Hazbi Lika, nën akuzën për “shpërdorim detyre”. Vendimi do të qëndrojë në fuqi deri në përfundim të procesit gjyqësor.
Sipas hetimeve të Prokurorisë së Durrësit, Lika dyshohet se ka neglizhuar ushtrimin e kompetencave të tij, duke mos nxjerrë një urdhër për kontrollin e kopshteve dhe çerdheve që operonin pa licenca në juridiksionin e Drejtorisë Rajonale të Arsimit Parauniversitar Durrës.
Vetë Hazbi Lika ka pranuar pezullimin, duke pohuar për mediat se masa lidhet me një kontroll të Prokurorisë në vitin 2023. Ai është shprehur se nuk ka qenë në dijeni se kishte kompetencë për të nxjerrë urdhrin për kontrollet në fjalë.
“Unë nuk kam nxjerrë urdhër për kontrollin e çerdheve dhe kopshteve që funksiononin pa liçenca në Rajonin që Mbulon DRAPI i Durrësit. Por unë nuk e kam ditur që e kam këte kopetencë“, deklaroi ai.
Hazbi Lika mban postin e drejtorit të Drejtorisë Rajonale të Arsimit Parauniversitar Durrës që prej majit të vitit 2022, duke pasuar në këtë detyrë Ana Dhamon.
