Një tjetër fitore e merituar për boksierin shqiptar Florian Marku.
Florian Marku siguroi fitoren e tij të 11 në ringun profesionist ku nuk njeh humbje, duke mbrojtur brezin e IBF që e fitoi disa muaj më parë.
Në raundin e katërt Marku lëshoi një breshëri grushtesh duke e detyruar gjyqtarin të ndalë ndeshjen pasi kundërshtari i tij nuk ishte më në gjendje të vazhdonte. KO për Markun dhe fitorja e 11.
Kujtojmë se ditën e sotme boksieri ynë, Florian Marku ka dhënë një intervistë në prag të ndeshjes së sotme, ku ka folur për “BBC”.
Luftëtari 29-vjeçar ka treguar rrugëtimin e tij, nga kickbox-i e deri në aventurën e tij në boksin profesionist.
“Kam lindur në Shqipëri dhe jam rritur në Greqi, teksa e kam nisur me kickbox-in, duke regjistruar rreth 100 ndeshje në karrierë. Kam punuar shumë vazhdimisht dhe në të gjithë karrierën time numëroj vetëm katër beteja të humbura, teksa të gjithë u befasuan me kalimin tim në një tjetër disiplinë, si boksi’, shprehet Marku.
“U bëra i njohur kur ndeshesha në MMA dhe publiku më do e më mbështet shumë, teksa më quan edhe “mbreti shqiptar”. Nuk e dija që kishte kaq shumë shqiptarë këtu në Angli, por e mësova kur erdha të ndeshem këtu. Dy ndeshjet e para në Londër, i shita vetë të gjithë biletat dhe mbështetja e publikut shqiptar është një frymëzim i jashtëzakonshëm për mua”, deklaroi boksieri shqiptar.
