Ukraina po bën pothujse 8 muaj luftë, ndërkohë që Rusia nuk ndalet me sulmet e saj mizore.
Bëhet me dije se një valë e re shpërthimesh po raportohet në disa qytete anembanë Ukrainës, një ditë pasi Rusia nisi sulmet me dronë në shumë qytete të vendit, përfshirë edhe qendrën e kryeqytetit.
Aktualisht është pak minuta para orës 9 të mëngjesit me orën e Kievit, sulme janë raportuar nga autoritetet në Kryvyi Ri, Dnipro, Kharkiv dhe Mykolaiv. Në Mykolaiv, sulmi ka shkatërruar totalisht një krah të një ndërtese apartamentesh. Të paktën një person vdiq në sulm, sipas dëshmitarëve, sipas Guardian.
Ndërkohë që raketa shkatërroi plotësisht një krah të ndërtesës në zonën e qendrës së qytetit, duke lënë një zjarr masiv. Një ekip zjarrfikës nxori trupin e pajetë të një burri nga rrënojat, tha dëshmitari.
Në Dnipro, sulmet kishin në shënjestër infrastrukturën energjetike, duke shkaktuar dëme serioze sipas Kyrylo Tymoshenko, nënkryetar i zyrës së presidentit ukrainas. Më pak detaje ka për sulmet në Kryvyi Ri dhe Kharkiv, por Kreu i Administratës Ushtarake Rajonale të Kharkivit ka njoftuar se Rusia po fillon sulme në qytet, si dhe në rajon.
“Vëmendje, banorë të Kharkivit dhe rajonit: pushtuesit rusë po godasin. Qëndroni në strehimore!”, ka bërë thirrje ai.
Lufta në Ukrainë nuk dihet se sa do të vazhdojë dhe si do të përfundojë, por shtetet perëndimore dhe SHBA janë rreshtuar krah Ukrainës dhe po e mbështesin çdo ditë atë me armatime të reja. Një paketë e re ndihme ushtarake prej 725 milionë dollarësh nga Shtetet e Bashkuara për Ukrainën pritet të përfshijë municione dhe automjete ushtarake, por jo aftësi të reja të konsiderueshme ose mbrojtje kundërajrore, i thanë agjencisë Reuters të premten dy zyrtarë amerikanë të informuar mbi ndihmën. Paketa është e para që nga breshëria e sulmeve me raketa që Rusia lëshoi mbi qendrat e popullsisë civile në Ukrainë këtë javë. Ndihma e fundit do ta çonte në më shumë se 17.5 miliardë dollarë shifrën e përgjithshme të ndihmës ushtarake të Shteteve të Bashkuara që kur Rusia filloi agresionin nga Ukrainës më 24 shkurt. Presidenti amerikan Joe Biden i kërkoi Sekretarit të Shtetit “të udhëzonte tërheqjen deri në 725 milionë dollarë në artikuj dhe shërbime të mbrojtjes të Departamentit të Mbrojtjes, si dhe në drejtim të trajnimit ushtarak” për të ndihmuar Ukrainën.
