Hyrja në stadiumin “Air Albania” ka nisur në orën 18:00 dhe vijon ende
Disa orë para ndeshjes ku do të luhet finalja e Conference League mes Romës dhe Feyenoord, një tifoz i Feyenoord është arrestuar pasi kishte arritur të kalonte kordonin e parë të policisë. Ndërkaq mësohet se tifozët i janë nënshtruar kontrolleve të rrepta të sigurisë. Ata duhet të jenë të pajisur me biletën, ndërsa po kontrollohen që të mos marrin me vete sende të forta si dhe monedha.
Kujtojmë që mbrëmjen e djeshme 10 punonjës të policisë së shtetit kanë mbetur të lënduar si pasojë e përplasjes mes tifozerive të Romës dhe Feyenoord në rrugët e Tiranës. Fillimisht kanë qenë tifozët hollandezë ata që kanë tentuar të shkojnë drejt ambienteve ku qëndronin tifozët e Romës, dhe policia ka mundur që të shmangë përplasjen duke i ndaluar.
Ndërkohë që një pjesë tjetër e tifozë të Romës kanë krijuar incidente në zonën e 21-shit, por fatmirësisht kanë arritur që të neutralizohen nga punonjësit e policisë.
“Apelojmë për bizneset në Tiranë, që të mos tregtojnë pije alkoolike në shishe dhe gota qelqi, pasi përbëjnë rrezik të shtuar për shëndetin dhe jetën e qytetarëve në rast përfshirje të konflikteve fizike. Nëpërmjet kësaj daljeje publike apelojmë dhe adresojmë një thirrje për tifozët italianë dhe holandezë, të cilëve do t’ua komunikojmë edhe nëpërmjet kanaleve zyrtare, që të sillen dhe veprojnë si qytetarë europianë, në qytet dhe në stadium, të zbatojnë ligjet e shtetit shqiptar dhe të mos konfrontohen me punonjësit e Policisë, përndryshe ligji do të zbatohet me rigorozitet”, ka deklaruar më herët zv/drejtori i Përgjithshëm i Policisë së Shtetit.
