Mbrëmjen e 15 tetorit të këtij viti, një ngjarje tragjike ndodhi në një hotel në Kavajë, ku 4 turistë rusë vdiqën në rrethana plotësisht misterioze.
Një familje ruse, prindërit me vajzën dhe dhëndrin u gjetën të vdekur, brenda një saune në hotel “Gloria” në Qerret të Kavajës. Trupat e pajetë u gjetën nga recepsionistja e hotelit, e cila dëshmoi se i ka thirrur disa herë por nuk i janë përgjigjur. Nataliia Burenkova, 58 vjeçe, Sergei Burenkov, 60 vjeç, Nikita Belousov, 37 vjeç, Ekaterina Burenkova, 31 vjeçe ishin viktimat e ngjarjes.
Ka qenë djali i familjes, Aleksandër Burenkov, i cili ka tërhequr trupat e prindërve të tij Nataliia Burenkova dhe Sergei Burenkova, si dhe të motrës Ekaterina Burenkova dhe partnerit të saj Nikita Belousov nga morgu.
Familja u gjend në Shqipëri pas një turi në të gjithë botën, në vendet me të synuara nga turistët, gjë e cila dëshmohet me anë të fotove që ato publikonin në rrjetet e tyre sociale.
Në hotelin “Gloria” në Qerret, familjarët erdhën nga Ohri, dhe dita e parë e tyre në vendin tonë, u kthye në tragjedi.
Pas vdekjes të rusëve që policia fillimisht tha se u asfiksuan brenda saunës, u përfol për përdorim të lëndëve narkotike dhe alkolit, apo edhe helmimit me agjentë biologjikë.
Vdekja e 4 turistëve në Kavajë është cilësua fillimisht si vrasje nga organi i akuzës, por pavarësisht kësaj edhe pse kishte kaluar më shumë se një muaj, Prokuroria e Kavajës nuk kishte asnjë person të shpallur në kërkim.
Hetimet e ngjarjes që tërhoqi jo pak vëmendjen e mediave të huaja janë bërë në mënyrë të gabuar.
Prokuroria e Kavajës dërgoi monstrat e ujit dhe ajrit për ekspertizë por ekspertët e shëndetit publik nuk u pyetën fare për menyrën se si duheshin marre këto monstra.
Grupi i hetimit që investigoi vdekjen misterioze të katër turistëve rusë dërgoi në mënyrën e gabuar pranë ISHP mostrat e pishinës pranë të cilës u gjetën të pajetë trupat e katër qytetarëve rusë. Për këtë arsye, ISHP i ktheu më pas dhe ka kërkuar t’i dorëzohet në formën e duhur nga ligji.
Gjatë një interviste për Top Channel, profesori Arben Luzati deklaroi se këto mostra duhet të ishin marrë nga specialistët.
Grupi i hetimit ka dërguar gabimisht edhe disa mbetje ushqimore pranë ISHP që u kthyen pas dhe u dërguan për ekspertim pranë AKU.
Të gjitha këto veprime ngrenë pikëpyetje mbi mënyrën si është administruar vendngjarja dhe a kanë apo jo kapacitete institucionet shqiptare për të kthyer përgjigje shkencore dhe të pakontestueshme mbi vdekjen e rusëve që u gjetën të vdekur nga recepsionistja gati një orë pasi kishin hyrë në pishinën dhe xhakuzin e resortit në Qerret.
Ndërkohë pasi kanë kaluar dy muaj nga ndodhia tragjike, ekspertë të ushtrisë me pajisje të posaçme janë përfshirë në hetimin për të zbuluar misterin e vdekjes së katër turistëve ruse në një hotel në Qerret të Kavajës. Për dy ditë ata do të kryejnë eksperimente hetimore për të zbuluar nësë në ambientet e hotelit ka pasur elementë kimik.
Grupi hetimor së bashku me ekspertë të strukturës ushtarake, kanë rikrijuar kushtet në spa-në e hotelit në katin e nëndheshëm, për të dalë në konkluzione nëse kemi të bëjmë me asfiksinë apo me pistën e një vrasje të mirfilltë dhe të mirmenduar me agjentë të tjerë kimikë.
Hetues dhe ekspertë janë kthyer në vendngjarje për të krijuar të njëjtat kushte në ambientet e pishinës, të njëjtën temperaturë dhe nivel të klorit në ujin e saj, për të kuptuar nëse këta faktorë krijojnë kushte për të çuar në asfiksi vdekjeprurëse 4 persona njëkohësisht.
Përmes këtij eksperimenti do të vlerësohet efekti i avujve të çliruar nga klori në ujë dhe temperatura e ambientit, efekt ky që nuk u llogarit menjëherë pas ngjarjes. Kujtojmë se Instituti i Mjekësisë Ligjore ka përcaktuar shkakun paraprak të vdekjes së tyre, pasi në gjak iu gjet prani e monoksidit të karbonit.
Tashmë pasi kanë kaluar dy muaj, një kohë e konsiderueshme për të zhdukur provat e vdekjes së katër turistëeve rusë, po ndërmerren eksperimente që të zbulojnë shkakun e vdekjes së tyre.
Pas një sërë sorolltjesh proceduriale të hetimit, të cilat u shoqëruan me shumë gabime po ndërmerret një veprim i vonuar nga ana e strukturave hetimore të Shqipërisë.
