Erjon Goxhara ka dëshmuar para hetuesve një ditë pasi u dorëzua në drejtorinë e Policisë së Tiranës. Efektivi ka deklaruar se nuk ka pasur qëllim që ta vriste 45-vjeçarin Lorenc Kosta, me të cilin gruaja e tij dyshohet se kishte një lidhje jashtëmartesore.
Goxhara pretendon se ka qenë duke konsumuar drekë me vajzën e tij, në momentin që ka parë Kostën, dhe më pas e ka qëlluar.
“Nuk kam dashur ta vras Lorenc Kostën dhe e kam parë rastësisht në zonën e “Komunës së Parisit” pasi kam qenë me vajzën time në një lokal në atë zonë. Pasi kam larguar vajzën jam kthyer sërish te “Komuna e Parisit” dhe e kam qëlluar Kostën me armën e shërbimit të cilën e kisha me vete. Deklaroj se nuk e kam bërë me paramendim plagosjen e Kostës”, është shprehur Goxhara, i cili akuzohet për veprën penale ‘vrasje me paramendim’ e mbetur në tentativë.
Efektivi ka shfaqur shenja pendese, dhe ka deklaruar se kur ka kryer krimin ka qenë në kushte të rënduara psikologjike.
“Isha i tronditur”,mësohet të ketë thënë Goxhara në rajon pasi u vetëdorëzua.
Ngjarja ndodhi tre ditë më parë. Efektivi i policisë e qëlloi në mes të rrugës 45-vjeçarin, duke i shkaktuar plagë në pjesët e këmbëve dhe ato intime. Goxhara qëlloi me armë zjarri 45-vjeçarin Lorenc Kosta, pasi ky i fundit dyshohet se kishte lidhje me bashkëshorten e efektivit të Policisë.
