Guvernatori i Jorkut, Andrew Cuomo ka reaguar menjëherë pasi hetimet e prokurorisë dolën në përfundimin se ai kishte ngacmuar seksualisht shumë gra brenda dhe jashtë administratës së tij.
Në një deklaratë të regjistruar, guvernatori hodhi poshtë gjetjet nga hetimi i Prokurores së Përgjithshme të Nju Jorkut Letitia James, të cilin ai pretendoi se nuk ishte i paanshëm.
“Faktet janë shumë të ndryshme nga ato që janë portretizuar. Unë kurrë nuk kam prekur askënd në mënyrë të papërshtatshme ose të kem bërë komente të papërshtatshme seksuale. Ky thjesht nuk është ai që jam dhe nuk është ai që kam qenë ndonjëherë”, tha Cuomo.
Ai u shpreh se avokatët e tij kishin bërë një kundërshtim pikë për pikë të disa prej akuzave të bëra kundër tij. Ai transmetoi gjithashtu një foto -montazh të tij duke puthur, përqafuar dhe prekur njerëzit në ngjarje publike gjatë viteve dhe bëri argumentin se kjo sjellje “kishte për qëllim të përcillte ngrohtësi, asgjë më shumë”.
“Në fakt e kam mësuar nga nëna ime dhe nga babai… e bëj me të gjithë; të bardhë e zinj, të rinj dhe të moshuar, ‘straight’ dhe LGBTQ, njerëz të fuqishëm, miq, të huaj, njerëz që takoj në rrugë. Unë i puth njerëzit në ballë… Unë i përqafoj njerëzit. Unë përqafoj njerëz: burra dhe gra. Unë herë pas here them ‘ciao bella.’ Me raste e teproj dhe them zemër… Unë jam i njëjti person në publik si në privat”, tha guvernatori.
Hetimi gati pesë mujor, i kryer nga dy avokatë të jashtëm që folën me 179 persona, zbuloi se administrata Cuomo ishte një “mjedis armiqësor pune” dhe se ishte “i mbushur me frikë”. Njerëzit e intervistuar përfshinin ankues, anëtarë aktualë dhe të mëparshëm të dhomës ekzekutive, ushtarë shtetërorë, punonjës shtesë të shtetit dhe të tjerë që ndërvepronin rregullisht me guvernatorin.
