Gjoba që shteti shqiptar Iidetyrohet biznesmenit italian Francesco Becchetti ka nisur të arkëtohet. Gjoba prej 110 milionë euro ka filluar prej disa kohësh të ekzekutohet, madje janë paguar deri në 4 milionë euro.
Arkëtimi i gjobës po bëhët nëpërmjet llogarisë Albcontrol në Eurocontrol. Paratë që duhet të vinin në Albcontrol nga Eurocontrol, tashmë po konfiskohen rregullisht për llogari të biznesmenit italian dhe prej muajsh llogaria e Albcontrol është e bllokuar. Ajo do të qëndrojë e tillë deri në ekzekutimin e plotë të gjobës prej 110 milionë euro, e cila tashmë është bërë 120 milionë së bashku me interesat.
Kujtojmë që Qendra Ndërkombëtare për Zgjidhjen e Mosmarrëveshjeve të Investimeve (ICSID) një gjykatë arbitrazhi, pjesë e Bankës Botërore vendosi që Shqipëria t’i paguante biznesmenit italian Francesco Becchetti një gjobë prej 110 milionë eurosh, pasi e konsideroi mbylljen e televizionit “Agon Channel”, pronar i së cilit Becchetti ishte, të motivuar politikisht.
Mirëpo, në betejën disa vjeçare me biznesmenin, deklaratat e forta nga qeveritarët shqiptar nuk kanë munguar.
“Është temë e rëndësishme, sepse të gjtiha kanë shpresë tek ky marifetçiu në këto zgjedhje duke përdorur këtë gjyq. Ato 110 milionë nuk ka për ti marrë kurrë. Ju them shqiptarëve, që kjo nuk ka mbaruar. Se si, nuk e them dot tani. Mbajeni këtu, ai do të paguajë një për një, dëmet që u ka sjellë shqiptarëve. Jam nga ata që kur them cfarë nuk do të lejojë të ndodhë, nuk e luan topi”, deklaronte kryeministri Edi Rama në prill të vitit 2021, pasi Becchetti e kishte fituar gjyqin.
Të njëjtën gjë kishte deklaruar edhe ministri Arben Ahmetaj rreth një vit më parë.
“Ça e keni tani këtë histori. Jo! Asnjë kokërr leku nuk do marrë. Asnjë kokërr leku”, ishte shprehur Ahmetaj.
Pavarësisht këtyre deklaratave, gjoba jo vetëm që ka filluar të ekzekutohet, por 3-4 milionë euro të saj janë paguar, ndërkohë që asgjë nuk është bërë publike nga institucionet shqiptare. Becchetti nga ana tjetër, e ka reklamuar me të madhe fitoren e tij në rrugët e Romës disa muaj më parë me postera ku shkruhej: “Unë kam fituar!”
