Deputetja e Partisë Demokratike Jorida Tabaku është shprehur skeptike në lidhje me investimin në Sazan, duke marrë parasysh atë që u bë me Portin e Durrësit. Gjatë fjalës në Kuvend ajo u shpreh se nuk është kundër investimeve të huaja, por duke marrë parasysh që qeveria ‘fali’ një pronë shumë të vlefshme si porti ekzistues në Durrës, përjashtuan Alabarin nga taksat, si dhe do merren 400 mln euro nga buxheti për ndërtimin e portit të ri (kryeministri tha që ndërtohej me paratë e privatit), kërkohet një transparencë për projektin e Sazanit.
“Këtu janë bërë ligje jo në favor të qytetarëve. Një nga ligjet është ai për Portin e Durrësit, që u tha se asnjë para nuk do të dalë nga buxheti. Ligji për zonat e mbrojtura bën që në këto zona të ketë ndërtime. Është skandal fakti që ndërtohet në zonat e mbrojtura. Tani del lajmi se në Sazan do të ndërtojë një sipërmarrës serioz. Duhet të bëhej garë për kompaninë që merr përsipër të ndërtojë në Sazan dhe jo të bëhet fakt direkt në parlament.
Turizmi të zhvillohet, por zhvillimi duhet të vijë në mënyrë graduale. Përse nuk bëhen gara të hapura për investimet e huaja? Çdo ligj që miratohet në parlament duhet të ketë frymën e ligjeve që miratohen edhe në Kuvendet e vendeve që janë pjesë e Bashkimit Europian. Qeveria harxhon më shumë kohë në SPAK se në zyrat e saj. Nuk mund të flasin për luftë ndaj korrupsionit ata që ndodhen sot në dyert e SPAK-ut”, u shpreh Tabaku.
