Kishte shkuar në Turqi për një kurim më të mirë dhe për të luftuar virusin që e kishte zënë prej pak kohësh si shumë të tjerë, por as aty nuk ja ka dalë t’i mbijetojë virusit vrasës.
Presidenti i “Fax News”, Kasem Hysenbelliu, është ndarë nga jeta sot pas komplikacioneve të shkaktuara nga COVID-19. Hysenbelliu ishte dërguar në Turqi prej disa ditësh, ku po merrte trajtim mjekësor por për fat të keq, nuk mundi të fitojë betejën me COVID-19. Ai u nda nga jeta në moshën 59-vjeçare.
Kasem Hysenbelliu, është themeluesi i televizionit informativ “Fax News” dhe portalit “Faxweb.al”, grupit mediatik që hyri në treg në vitin 2018, ndërsa më herët ka drejtuar edhe “News24”, “Panorama Group” dhe portalin “Balkanweb”.
Kjo është një ditë e dhimbshme për “Fax News” dhe “Faxweb”, teksa i gjithë stafi i televizionit dhe webit që ai themeloi, i shprehin ngushëllimet familjes së presidentit Hysenbelliu.
Hysenbelliu themeloi dhe administroi “TV Fax News” që nga Tetori i vitit 2017, ndërsa sot është dhe 4 vjetori i krijimit të “Faxweb.al”, që daton në treg që nga data 5 Dhjetor të 2016-ës.
Kasem Hysenbelliu, themeloi të parin TV të pavarur në vend, teksa “Fax News” u shndërrua në zërin e njerëzve të thjeshtë.
/GazetaReforma.com/
