Efektivët e Policisë janë larguar “duarbosh” nga banesa e ish-kryeprokurorit Adriatik Llalla, pasi nuk e kanë gjetur këtë të fundit aty. Policia ka kontrolluar në shtëpinë e tij, por nuk ka mundur ta arrestojë. Më pas, forcat e policisë u larguan pa dhënë asnjë prononcim për mediat.
Ish-kryeprokurori duket se është larguar nga Shqipëria në drejtim të Turqisë kohët e fundit, ndërsa kërkimet do të vijojnë dhe pse vendndodhja e Llallës nuk dihet me saktësi.
Ditën e sotme Adriatik Llalla u dënua me dy vite burg nga apeli i GJKKO. Atij gjithashtu iu hoq e drejta për të ushtruar funksione publike për 5 vjet dhe u vendos për konfiskim të pasurisë. Në pasuritë e konfiskuara përfshihen edhe 4 sipërfaqe toke që në total shkojnë në mbi 22 mijë metër katror si dhe një apartament në qytetin e Durrësit. Ndaj tij rëndojnë akuzat për “Refuzim për deklarim, mos deklarim, fshehje ose deklarim i pasurive, interesave privat të personave të zgjedhur dhe nëpunësve publik ose i çdo personi tjetër që ka detyrim ligjor për deklarim”.
Në seancën e ditës së sotme, avokati i Llallës, Sokol Hazizaj deklaroi se nuk është në dijeni të vendndodhjes së ish-kryeprokurorit. Nëse Llalla nuk paraqitet pas lënies në fuqi të vendimit, ndaj tij mund të shpallet urdhër kërkimi ndërkombëtar.
