Një plagosje me armë zjarri tronditi mëngjesin e ditës së sotme fshatin Mushan të njësisë Dajç, pjesë e bashkisë Shkodër ku mbeti i plagosur 24-vjeçari Isak Mehmeti.
24-vjeçari i plagosur ka shkuar vetë në spitalin rajonal të Shkodrës duke mos pritur Policinë apo një ambulancë të shërbimit kombëtar të urgjencës. Sipas burimeve spitalore bëhet me dije se shtetasi Isak Mehmedi është plagosur me një plumb në pjesën e barkut dhe është jashtë rrezikut për jetën dhe aktualisht po mbahet nën kujdesin e mjekëve ne spital. Portali “Panorma.al” ka bërë të mundur zbardhjen e dëshmisë së Mehmetit.
Në dëshminë e tij të dhënë për policinë nga spitali 24-vjeçari ka deklaruar se ai nuk e di se kush është personi që e ka plagosur.
“Unë nuk e di se kush më ka plagosur. Nuk e kam parë autorin dhe nuk e di se kush mund të jetë. Nuk kam ndonjë konflikt me kënd dhe nuk e di përse më plagosën’”, mësohet të ketë thënë 24 vjeçari.
PLAGOSJA
Sipas burimeve nga vendngjarja shtetasi Isak Mehmedi ishte duke hedhur mbeturinat në afërsi të banesës së tij kur papritur një person është afruar dhe ka qëlluar në drejtim të tij duke e lënë të plagosur.
Policia ka mbërritur në vendngjarje pas informacionit për plagosjen por ende nuk ka arritur që të identifikojë autorin që qëlloi me armë të riun nga Mushani.
Shtetasi Isak Mehmedi është kushëri i vëllezërve Mehmedi ku njëri prej tyre Duel Mehmedi është i dyshuar si autor i vrasjes së shtetasit Ridvan Ramazani, ngjarje e ndodhur kjo më 28 nëntor 2020.
