Një vajzë 16-vjeçare me origjinë shqiptare, Emila Veliu, rezulton e zhdukur që prej datës 16 qershor në lagjen Petralona të Athinës, pa lënë asnjë gjurmë.
Ajo nuk është kthyer në shtëpi që nga ajo ditë dhe familja ka ngritur alarmin për një situatë të pazakontë dhe shqetësuese.
Sipas përshkrimit të bërë publik nga organizata “Hamogelo tou Paidiou”, e cila po ndihmon në kërkime me miratimin e familjes, Emila ka flokë të kuqe, sy kafe, është rreth 1.70 metra e gjatë dhe peshon afërsisht 65 kilogramë.
Ditën e zhdukjes kishte veshur xhinse të zeza, një kanotiere të zezë, syze optike dhe mbante një çantë ngjyrë bordo.
Familjarët kanë shpërndarë apelin për ndihmë në rrjetet sociale dhe janë në kontakt të vazhdueshëm me autoritetet greke, të cilat po ndjekin çdo informacion të mundshëm.
Ndërkohë, halla e vajzës ka pohuar se Emila është shpallur e rrëmbyer nga policia greke.
Në një intervistë për protothema.gr, nëna e Emilas tregoi me ankth për natën e fundit që kishte komunikuar me të bijën:
“Nuk kam dëgjuar më nga vajza ime që nga nata e së hënës kur ajo u zhduk. Më tha se do të dilte me shoqet e saj për një shëtitje dhe që atëherë nuk është kthyer në shtëpi. Kur pashë se po vonohej të kthehej nga shëtitja, u shqetësova dhe komunikimet tona të fundit ishin nëpërmjet mesazheve në celularin e saj. Mesazhi i fundit ishte se ‘Nuk do të kthehem më në shtëpi’. Jam shumë e shqetësuar për fatin e fëmijës tim për momentin, telefoni i saj celular është i çaktivizuar, kam frikë se duhet të jetë përfshirë me shoqe të këqija, sepse nuk ka dalë kurrë me shoqet dhe shoqet e saj, siç më kishte thënë. Dhe mesazhi që dërgoi se ‘Nuk do të kthehem më në shtëpi’, besoj se fshihet një person tjetër që dëshiron ta dëmtojë. Dua të zbuloj informacione për vajzën time, po e kërkoj kudo dhe dua që ajo të kthehet përsëri në shtëpinë tonë…”
Autoritetet greke po vijojnë hetimet dhe kërkimet, ndërsa çdo informacion që mund të ndihmojë në lokalizimin e Emilas kërkohet të raportohet menjëherë në policinë lokale ose në numrat e emergjencës.
