Raporti i publikuar nga Eurostat e klasifikon Shqipërinë tek vendet me të ardhurat më të ulëta në rajon për frymë, dhe për pasojë kanë edhe nivel të ulët konsumi.
Në vitin e vështirë të pandemisë Covid-19, EUROSTAT shprehet se të ardhurat për frymë në 2020 në Shqipëri ishin sa 30% e mesatares së Bashkimit Evropian. Ndërsa sa i takon konsumit individual, ai është sa 39% e mesatares së BE-së.
Që prej vitit 2016, sipas EUROSTAT, të ardhurat për frymë në Shqipëri kanë mbetur të pandryshuara, në 30% të mesatares së BE-së.
Në një kohë kur presidenti Meta ka bërë rezitencë në lidhje me dekretimin e “Buxhetit 2022”, pas këtij raporti ai ka një argument të fortë në mbështejtje të qëndrimit të tij.
Më herët kreu i shtetit e konsideroi buxhetin e vititi 2022 si antisocial dhe që nuk targetonte grupet vulnerabël
“Buxhetin 2022” është ANTISOCIAL. Dekretova kthimin në Kuvend sepse nuk parashikon ASNJË ndihmë shtesë ekonomike për: 258,840 qytetarë, që jetojnë me 0.7 USD/ditë; 440,579 pensionistë në qytet, që jetojnë me 4.8 USD/ditë; 103,626 pensionistë në fshat, që jetojnë me 2.8 USD/ditë”, shkruante Meta.
Ndërkohë ditën e sotme Meta ka reaguar në lidhje me raportin e EUROSTAT, ku Shqipëria renditej e para në rajon për nivelin e lartë të varfërisë, çmimeve dhe të borxhit publik.
Kreu i shtetit theksoi se tashmë është koha për të rishikuar Buxhetin e Shtetit në mbështetje të qytetarëve, të shtresave më në nevojë dhe zhvillimit ekonomik të qëndrueshëm të vendit. Sipas Metës, çështjeve të mësipërme duhet t’u jepet përparësi, dhe jo koncensioneve, inceneratorëve dhe PPP-ve.
“TË PARËT në rajon për nivelin e lartë të VARFËRISË, ÇMIMEVE, dhe BORXHIT PUBLIK.
TË FUNDIT për TË ARDHURAT për frymë dhe KONSUM individual. Shqipëria renditet e para në rajon për nivelin e varfërisë, të çmimeve dhe borxhit publik dhe e fundit në Europë për të ardhurat për frymë e konsum. Sipas të dhënave të EUROSTAT për vitin 2020, Shqipëria rezulton se të ardhurat për frymë i ka 30% të mesatares së Bashkimit Europian, pas saj renditet Bosnje dhe Hercegovina me 33%, Maqedonia e Veriut me 38%, Serbia 43% dhe Mali i Zi me 45%.
Për konsumin individual për frymë, që mat mirëqenien familjare, Shqipëria është sërish e fundit në Europë, me 39% të mesatares së BE-së, përkundrejt 42% në Bosnje dhe Hercegovinë, 43% në Maqedoninë e Veriut, 51% për Serbinë dhe 59% për Malin e Zi.
Ndërkohë niveli i çmimeve në Shqipëri, së bashku me Malin e Zi, është më i larti në rajon me 53.5%, Serbia 52.3%, Bosnjë-Hercegovina 51.9% dhe Maqedonia e Veriut me 46%.
Gjithashtu, Shqipëria pas Malit të Zi, renditet ndër vendet me nivelit më të lartë borxhit publik me 77.9%, e ndjekur nga Serbia me 58.9%, Maqedonia e Veriut me 51.3%, Bosnje dhe Hercegovina me 36.7% dhe Kosova me 24.1%.
Sa i përket nivelit të varfërisë, Shqipëri mban vendin e parë me rreth 33% të popullsisë me të ardhura nën 5.5 $ në ditë, duke lënë pas Kosovën me 23.4% e popullsisë, Malin e Zi me 20%; Maqedoninë e Veriut me 18% dhe Serbinë 18.4%.
Në ligjin për “Buxhetin 2022” konstatova se Qeveria nuk ka marrë masat e duhura ekonomike dhe sociale për të përmirësuar të gjithë këto tregues negativë. Për këtë arsye vendosa të mos ta dekretoj me miratim “Buxhetin 2022”, që thellësisht është ANTISOCIAL.
Është koha për të rishikuar Buxhetin e Shtetit në mbështetje të qytetarëve, të shtresave më në nevojë dhe zhvillimit ekonomik të qëndrueshëm të vendit, duke investuar në mënyrë konkrete aty ku duhet të jenë përparësitë, jo tek koncensionet, inceneratorët dhe PPP-të”, shprehet Meta.
