Një rast i paprecedentë ka ndodhur në Gjermani, ku një infermiere u ka injektuar njerëzve ujë me kripë në vend të vaksinës anti-Covid. Autoritetet kanë nisur tashmë një hetim, ndërsa u kanë bërë thirrje mijëra qytetarëve që të vaksinohen sërish.
Hetuesi i policisë Peter Beer, duke folur më herët në një konferencë shtypi të mbuluar nga mediat gjermane, tha se bazuar në deklaratat e dëshmitarëve kishte “një dyshim të arsyeshëm të rrezikut”.
Ngjarja ka ndodhur në një qendër vaksinimi në Friesland, një zonë rurale pranë bregut të Detit të Veriut, që në pranverë dhe bëhet fjalë për rreth 8600 banorë që mund të jenë prekur nga veprimi i infermieres. Në atë periudhë janë vaksinuar më së shumti të moshuarit që ishin në rrezik më të lartë për t’u infektuar nga Covid. Fatmirësisht, injektimi i ujit me kripë është i padëmshëm.
Autoritetet nuk e kanë konfirmuar ende nëse infermierja është arrestuar apo akuzuar për rastin, i cili i është dorëzuar një njësie speciale që heton krimet e motivuara politikisht. Kjo pasi infermierja mund të jetë shtyrë nga pikëpamjet e saj skeptike për vaksinën, për të injektuar ujë më kripë, gjë që e shpërndante edhe në mediat sociale. Policia lokale nuk ka pranuar të japë komente të tjera për ngjarjen.
