Fqinjët e Ramiz Muçollari, 62 -vjeçarit që plagosi gruan dhe djalin e më pas hapi zjarr ndaj policisë, kanë treguar më shumë lidhur me jetesën e atij.
“Siç më thanë ata që janë më afër kishte goditur të shoqen me thikë, të birin me qytë të armës së tij. Pastaj filluan armët”, tha një fqinj.
Fqinjët e tij kanë folur për mediat ku kanë treguar se ai ka qenë i qetë. Sipas tyre, 62-vjeçari ka pasur edhe më parë shqetësime mendore. Shkak për këtë, sipas tyre, janë problemet që kishte së fundmi me të birin.
“Ka qenë shumë i qetë. Ka pasur shqetësime mendore më përpara, por po bën 6-7 vjet përpara. Tani ishte mirë e bukur. Shqetësimi i fundit ka qenë tani në fund fare, nuk e di çfarë ka pasur me të birin. Unë s’mund të rri me të, por siç llafos njerëzia, lozte kumar, drogë, nuk e di. Shqetësimet i ka pasur nga i biri”, u shpreh fqinji, i cili pohoi se ai ka pasur marrëdhënie shumë të mira me të gjitha banorët.
“Nuk bënte shamatë, ka qenë njeri i qetë. Në lagjen tonë hera e parë që ka ndodhur diçka e tillë”, shtoi ai.
Një tjetër banor i zonës tregoi se ka dëgjuar të paktën 9 të shtëna.
“Zhurmë dëgjova. Një zhurmë teke, tre zhurma dyshe, një teke prapë. Më duket se qenë nja 9 (të shtëna). Gjatë natës nuk ka qëlluar. Unë isha larg në distancë, thashë se është ndonjë llamarinë”, tha fqinji.
Forcat RENEA po negociojnë për dorëzimin e 62-vjeçarit, por deri më tani ai nuk ka pranuar ta bëjë diçka të tillë.
