Prokuroria e Tiranës ka urdhëruar sekuestrimin e 2 pasurive të Alda Klosit. Bëhet fjalë për një garazh dhe një apartament në rrugën “Kongresi i Lushnjës”. Klosi akuzohet për fshehje të pasurisë, deklarim i rremë përpara oficerit të policisë gjyqësore dhe pastrim parash. Ajo përfundoi në pranga më 3 shkurt, pas dëshmisë së sanitares Rozeta Dobi, rreth parave të gjetura në banesën e kësaj të fundit që kapnin vlerën e mbi 600 mijë eurove.
Kujtojmë se pasi iu komunikua arrestimi dhe Alda Klosi u vendos në një nga dhomat e paraburgimit të Drejtorisë së Tiranës që atë natë, por pa u mbushur ende 48 orë nga qëndrimi në paraburgim, u njoftua se ish-zyrtarja u shtrua në QSUT për shkak të luhatjeve të tensionit.
Grabitja në banesën e ish-zyrtares së Kryeministrisë Alda Klosit, mori përmasa të mëdha , për shkak të shumës së lartë të parave për të cilën bëhej fjalë. Ishin, Rozeta dhe Havier Dobin, nënë e bir të akuzuar për vjedhjen e sasive të mëdha të parave në banesën e ish zyrtares, Klosi, prej më shumë se 120 mijë eurove, por pas një kontrolli të dytë në banesën e Rozeta Dobit e cila prej vitesh punonte si pastruese u zbuluan 404 mijë euro të tjera, duke shkaktuar një valë reagimesh.
