Flamur Noka është shprehur se bashkimi i demokratëve do të thotë rikthim në normalitetin para 9 shtatorit. Në 9 shtator 2021, një ditë para nisjes së sesionit të ri Parlamentar, kreu i PD-së asokohe, Lulzim Basha vendosi të pezullonte Sali Berishën nga Grupi Parlamentar pas shpalljes “non grata” nga SHBA.
Noka: Bashkimi i demokratëve do të thotë rikthim në normalitetin para 9 shtatorit. Ish-kryetari që mori vendim individyual pa pyetur institucionet, mori edhe faturën individuale me ikjen. Bashkë me të iku çdo vendim që ka marrë. Bashkim domethënë tërheqje e ankimimit në Gjykatë pasi drejtimin e vendos vota. Pas datës 6 mars ne që dolëm shumicë kemi bërë thirrje vetëm për bashkim. Kryetari i Grupit me ndonjë tjetër ka vazhduar agjendë tjetër përçarëse.
Rithemelimi ka zhvilluar zgjedhjet në disa qytete dhe do të vazhdojë në të gjithë vendin për të caktuar kryetarët e degëve të PD-së, sipas parimit një anëtar, një votë.
Megjithatë, Bushati, në mbledhjen e Grupit Parlamentar është shprehur se ky proces nuk është gjithë përfshirës. Më tej ai ka dhënë disa sugjerime se si mund të zgjidhet problem, sipas tij:
“Të ndalohet procesi i zgjedhjeve në degë. Të shtyhet për një periudhe jo me shumë se 1 mujore derisa të ndërmerren hapa të integrimit të të gjitha grupimeve në këtë proces.
Gjate kësaj periudhe mund të vendosim të mbledhim një Kuvend gjithë përfshirës, le ta quajmë ‘Kuvend Pajtimi’ nga ku të dalim me mesazhe të qarta për të ardhmen tonë dhe rikthimin si alternativë qeverisëse“.
Nëse ky hap merr dakordësi, automatikisht duhet të tërhiqet padia e bërë në Gjykatën e Apelit dhe të mos fokusohemi në debate juridike”.
Ai shkon më tej, duke kërkuar të ndalohet dalja në televizione e anëtarëve të grupit, “duke mbajtur qëndrime kontradiktore me njëri-tjetrin që evidentojnë dhe japin mesazhin se përçarja vazhdon”.
