Gjatë një diskutimi në Kuvend mbi propozimin e rezolutës kundër korrupsionit, deputeti Flamur Noka shprehu skepticizmin e tij të thellë ndaj efektivitetit të kësaj nisme, duke e cilësuar atë si një përpjekje cinike për të mbuluar problemet e thella të korrupsionit në Shqipëri. Noka argumentoi se pas tre mandateve që, sipas tij, lanë vendin të zhytur në korrupsion, është absurd të pretendohet se një rezolutë mund të sjellë ndryshime të vërteta.
“Shqiptarët ikën se nuk duan një Shqipëri të qeverisur nga hajdutë e kriminelë, ndaj çoni administratën kudo që të shiteni sikur keni pas vetes emigrantët,” tha Noka, duke iu referuar largimit të qytetarëve nga vendi për shkak të menaxhimit të dobët qeveritar dhe korrupsionit.
Ai shtoi: “Ky moment sot është nga më kulminantët. Të vish pas 3 mandatesh që e zhytët vendin në korrupsion e të kërkosh ta mbyllësh me një rezolutë është cinike. Të vijë Rama, përgjegjësi i hajdutërisë që ka pllakosur vendit, e të na thotë me këtë palo rezolutë që duhet të më gradoni si kalorësin e luftës ndaj korrupsionit, nuk ia rrok mendja askujt veç jush që ju ka shndërruar në eunukë. Nuk ka parodi më të madhe.”
