Ministria e Brendshme ka dhënë një njoftim të rëndësishëm lidhur me aplikimin për rinovimin e mjeteve të identifikimit. Ditën e nesërme do të jetë e hapur çdo zyrë ku mund të aplikohet për karta identiteti dhe pasaporta. Ministria e Brendshme iu bën thirrje të gjithë qytetarëve që iu ka përfunduar afati i vlefshmërisë së kartave, që të kryejnë gjithë procedurat e nevojshme dhe të aplikojnë sa më parë për rinovimin e mjeteve të identifikimit. Thirrjet nga ana e kësaj ministrie kanë qenë të shpeshta vetëm pak muaj para votimeve, për të cilat qytetarët duhet të kenë kartë ID ose pasaportë.
Zyrat e gjendjeve civile zakonisht qëndrojnë të mbyllura gjatë të shtunave dhe të dielave, por me sa duket kërkesa për aplikime nga qytetarët ka qenë më e lartë dhe zyrat do të qëndrojnë hapur edhe në 30 janar gjatë një dite në fundjavë.
Njoftimi i plotë Ministrisë:
“Rikujtojmë se riaplikimi për ID kartë mund të bëhet në çdo zyrë, pavarësisht vendbanimit.
Gjithashtu njoftojmë qytetarët që kanë aplikuar përgjatë vitit 2019 dhe 2020 dhe nuk kanë mundur të tërheqin ID kartat, të paraqiten pranë zyrave të aplikimit, pasi afati për nxjerrjen jashtë përdorimit të tyre është shtyrë deri në fund të prillit 2021”, thuhet në njoftimin e Ministrisë së Brendshme.
