Si sot një vit më parë në Shqipëri u konfirmuan rastet e para me koronavirus, duke shënuar kështu edhe nisjen e pandemisë në vendin tonë. Një 28 vjeçar e një 54-vjeçar babë e bir, që kishin udhëtuar nga Firence në Tiranë ishin të parët që u konfirmuan pozitiv në vendin tonë dhe prej atëherë shifrat kanë ardhur vetëm duke u përkeqësuar. Në 11 mars u konfirmua edhe vdekja e parë nga virusi, një 73-vjeçare nga Durrësi.
Nisjen e pandemisë në vendin tonë e ka kujtuar me një postim edhe ministrja e Shëndetësisë, Ogerta Manastirliu e cila shkruan se duhet safrificë që të çohet deri në fund lufta me armikun e padukshëm.
“Si sot një vit më parë, nisi beteja në vijën e parë të frontit e stafeve tona mjekësore në përballje me COVID19, në shërbim të jetës. Megjithë vështirësitë, kurrë nuk u dorëzuan në këtë vit sfidues të pandemisë, që njerëzimi e ndesh një herë në shekull..T’i ndihmojmë të gjithë bashkë, duke mos e ulur vigjilencën , me durim e sakrificë, ta çojmë deri në fund luftën me armikun e padukshëm. Sepse drita në fund të tunelit sa vjen e qartësohet, me intensifikimin e vaksinimit antiCOVID. #MëEMiraËshtëPërpara
#BashkëIaDalim”, shkruan Manastirliu.
Retorika që është përdorur prej fillimit të pandemisë ka qenë ajo e një lufte dhe një armiku inekzistent. Ushtria doli në rrugë, kryeministri dërgonte mesazhe dhe pushtonte telefonatat e njerëzve për t’i kujtuar të lanin duart. Dhe realisht bilanci i përnalljes me pandeminë ka qenë një bilanc lufte. Prej 9 marsit të vitit të kaluar janë shënuar 113,580 raste pozitive dhe 1,956 persona kanë humbur betejën në përballje me virusin. Aktualisht janë 37 737 raste active me koronavirus, ndërsa në vend ka nisur edhe procesi i vaksinimit me ritme mjaft të ngadalta. Deri tani janë kryer 20 275 vaksinime, ndërsa në vendin tonë kanë mbërritur vetëm 32 565 doza të vaksinës Pfizer, ndërsa pritet të vijnë edhe doza të tjera nga programii COVAX. Me këto ritme të vaksinimit lufta e gjatë me të cilën po përballemi prej një viti duket se nuk ka fund.
