Një vit pas atentatit mafioz me snajper ndaj Gëzim Sinomatit, djali i Sokol Sinomatit (i njohur si Buzderri), policia e Vlorës ende nuk ka zbardhur ngjarjen e rëndë.
Vrasja ndodhi më 7 janar 2024, në afërsi të Poliklinikës së qytetit, ku Sinomati u qëllua me një plumb ndërsa ndodhej në ballkonin e shtëpisë së tij.
Atentatorët përdorën një snajper, që dyshohet se ishte montuar në sediljen e pasme të një automjeti të mbështetur në një bllok betoni për të siguruar precizion maksimal.
Sinomati, i cili sapo kishte dalë për të pirë një cigare, u qëllua në mënyrë fatale, duke tronditur gjithë qytetin e Vlorës.
Policia, që fillimisht hetoi në disa pista, përfshirë edhe mundësinë e një ngatërrimi të shënjestrës me xhaxhanë e viktimës, Benardin Sinomatin, nuk ka mundur ende të identifikojë autorët.
Ish-drejtori i Policisë së Vlorës, Ermal Muça, së bashku me ish-ministrin e Brendshëm, Taulant Balla, patën premtuar zbardhjen e ngjarjes në një kohë të shpejtë, por sot, një vit më vonë, vrasja mbetet pa përgjigje.
Ngjarja është parë si fillimi i një përplasjeje të dhunshme midis bandave rivale në Vlorë, pasi gjatë fundvitit 2024 janë regjistruar disa ngjarje të tjera të dhunshme, të lidhura me këtë përplasje.
Më 8 dhjetor, një lëndë shpërthyese u vendos në lokalin “The Boss” në Lungomare, më 18 dhjetor, një tjetër atentat ndodhi ndaj Kevit Hajrullës në zonën e Çoles, ndërsa në Tiranë u regjistrua një sulm me tritol të montuar në dron, në një banesë të marrë me qira nga Elena Arza, ku qëndronte dhe Benard Sinomati.
Policia vijon hetimet për këto ngjarje, që besohet se janë të lidhura me njëra-tjetrën dhe përfaqësojnë përshkallëzimin e një konflikti të nisur me ekzekutimin e Gëzim Sinomatit një vit më parë.
