Ditën e sotme kontrolli i Policisë së Shtetit në kampin e muxhahedinëve në Manëz të Durrësit është shoqëruar me tensione të shumta. Raportohet se një person ka humbur jetën si pasojë e gazit lotsjellës që ka përdorur Policia e cila edhe pse në fillim e mohoi ngjarjen, më vonë në një reagim ka deklaruar se 65-vjeçari mbeti viktimë si pasojë e një arresti kardiak. Ndërkohë që avokati i muxhahedinëve Genc Gjokutaj, në një komunikim për mediat ka folur për situatën në kampin e muxhahedinëve në Manzë. Ai ka thënë se rezultati i operacionit të policisë ishte një viktimë, ndërsa theksoi se nuk ka pasur rezistencë nga ana e banorëve iranianë, duke shtuar se Prokuroria ka mbërritur për të bërë këqyrjen dhe se gjithashtu pritet ekspertiza mjekoligjore.
“Kanë ardhur në kamp dhe aty ka filluar i gjithë debate. Është përdorur gaz lotsjellës, shkopinj gome. Ne kemi ardhur me vonesë pasi operacioni ishte kryer, nuk jemi lejuar nga ana e policë të futemi brenda. Kur janë larguar kemi ardhur. I gjithë rezultati i këtij aksioni është një i vdekur që mendojmë se ka vdekur nga gazi lotsjellës dhe goditjet me sende të forta. Ka ardhur, pamja e tij është dukshëm me hematoma në ballë.
Ka ardhur prokuroria për të bërë këqyrjen dhe pritet ekspertiza mjekoligjore. Policia nuk ka kryer asnjë arrestim dhe kjo tregon se nuk ka pasur dhunë nga ana e banorëve këtu”, tha ai. Më herët avokati i muxhahedinëve, Genc Gjokutaj tha në një një intervistë për “News 24” se është konfirmuar që një person 65 vjeç ka humbur jetën ditën e sotme.
Ai tha se të paktën 50 persona të tjerë janë plagosur gjatë aksionit të policisë brenda kampit në zonën e Manzës.
“E kam të konfirmuar nga burime nga brenda. Trupi ndodhet brenda në kamp. Është i moshës 65 vjeç. Ai burrë nuk ka vdekur as dje, as nuk do vdiste nesër. Ka vdekur kur ka shkuar policia. Më lejoni të marr informacion dhe do t’ua komunikoj”, tha Gjokutaj.
Sipas tij “Personi i vdekur është i dëmtuar fizikisht, ka pësuar edhe gaz lotjsellës. Këtu do të fillojë një hetim dhe ai hetim do ti sqarojë të gjitha. Banorët e kampit nuk janë të armatosur, policia po. Më thonë që këtu është përdorur dhunë, janë thyer dyert, ndërkohë që këtu ka civilë. Hetimi duhet të jetë serioz dhe të vërë para përgjegjësisë të gjithë personat që kanë shkaktuar këtë ngjarje të rëndë”.
