Një variant i ri i Covid-19, i njohur si Xfg dhe i riemëruar nga ekspertët me emrin “Stratus”, po zëvendëson gradualisht variantin Nimbus dhe po përhapet me shpejtësi në Europë. OBSH-ja po e monitoron nga afër këtë variant, i cili vlerësohet se ka një aftësi më të lartë për t’iu shmangur antitrupave, duke e bërë atë më të vështirë për sistemin imunitar që ta njohë dhe neutralizojë.
Stratus pritet të qarkullojë gjatë muajve të verës dhe një nga simptomat që ka tërhequr vëmendjen është ngjirja e zërit. Në Indi, ku ky variant ishte dominues gjatë pranverës, mjekët kanë evidentuar këtë shenjë si karakteristike, krahas kollës së thatë, acarimit dhe dhimbjes në fyt. Në dallim nga valët e mëparshme kur humbja e nuhatjes dhe shijes ishin simptomat më të zakonshme, pacientët aktualisht raportojnë dhimbje të mprehta gjatë gëlltitjes, shpesh të përqendruara në pjesën e pasme të fytit.
Edhe në Mbretërinë e Bashkuar janë raportuar simptoma të ngjashme, përfshirë dhimbje të forta fyti, lodhje, ethe, bllokim të hundëve dhe dhimbje muskujsh, duke pasur parasysh ndryshueshmërinë e lartë të manifestimeve të Covid.
Stratus po fiton terren në tre rajonet kryesore të OBSH-së që ndajnë vazhdimisht të dhëna për Sars-CoV-2. Në Europë, përhapja e tij është rritur nga 10.6% në 16.7%, ndërsa në Azinë Juglindore ka shënuar një rritje të ndjeshme, duke kaluar nga 17.3% në 68.7%.
OBSH-ja këmbëngul në dhënien “përparësi të veprimeve specifike për të adresuar më së miri pasiguritë që lidhen me rrjedhjen dhe ashpërsinë e antitrupave”.
