Një tjetër e moshuar ka fituar betejën me koronavirusin.
“Dosja.al” bën me dije se një 85-vjeçare nga Durrësi ka lënë spitalin Infektiv.
Ndërkohë disa orë më parë, u dha lajmi se nënë Haxhireja nga Durrësi, 80-vjeç, fitoi betejën me COVID-19.
Lajmin e dha vetë kryeministri Edi Rama, nëpërmjet një postimi në rrjetet sociale.
Bilanci i COVID-19 në vendin tonë 212 të prekur, nga të cilët 40 të shëruar dhe 10 viktima.
Në spitalin Infektiv ndodhen 76 persona, 6 prej të cilëve në terapi intensive, ku 4 prej tyre janë intubuar.
Pjesa tjetër ndërkohë janë shtruar në pavion dhe ndodhen në gjendje të stabilizuar.
Pas spitalit Infektiv, ka filluar edhe funksionimi i karantinës te “Shefqet Ndroqi”.
Ditën e djeshme, u shënuan 15 raste të reja, ku hartës së qyteteve të prekura iu shtua edhe Mirdita.
Tirana mban vendin e parë për numër të prekurish me 121 raste, e ndjekur nga Fieri me 22 dhe Durrësi e Korça me 12.
Autoritetet ndërkohë vijojnë me thirrjet për respektimin e higjienës, distancimit social dhe kufizimit të daljeve nga shtëpia.
