Nuk ka të sosur tragjedia nga COVID-19 në Itali pasi gjatë 24 orëve të fundit janë regjistruar 837 viktima, duke pësuar një rritje të lehtë nga dita e djeshme, si edhe janë infektuar 4,053 persona duke e çuar në 105,792 numrin e të prekurve.
Kështu, numri i përgjithshëm i viktimave shkon në 12,428 dhe Italia vijon të jetë e para në rang botëror për numrin e viktimave, e ndjekur nga Spanja dhe Kina.
Sakaq, trendi i personave të shëruar vijon të jetë pozitiv, pasi rreth 1,109 persona janë shëruar brenda ditës së sotme, ndërsa sipas të dhënave të publikuara nga autoritetet e shëndetit, 400 persona ndodhen në spital dhe 42 prej tyre ndodhen në kujdes intensiv.
Mirëpo, mes mijëra viktimave që janë shënuar nga koronavirusi, ka pasur edhe shumë mjekë që nuk i kanë bërë ballë kësaj lufte të ashpër pasi sipas Federatës italiane të Mjekëve, kanë humbur jetën 66 mjekë nga COVID-19.
Mes tyre 5 mjekë kanë vdekur vetëm sot, shifër tejet e lartë për spitalet në vend, duke e bërë Italinë të gjunjëzohet gjithmonë e më shumë nga virusi vdekjeprurës, teksa afro 8,956 punonjës të kujdesit shëndetësor janë infektuar.
