Shtetet e Bashkuara thonë se po vlerësojnë njoftimin e talebanëve për një qeveri të përkohshme në Afganistan dhe e kanë bërë të qartë pritjen e tyre që populli afgan të meritojë një qeveri gjithëpërfshirëse.
“Ne do të vazhdojmë t’i mbajmë talebanët në angazhimet e tyre për të lejuar kalimin e sigurt për shtetasit e huaj dhe afganët me dokumente udhëtimi, duke përfshirë lejimin e fluturimeve aktualisht gati për të fluturuar jashtë Afganistanit në destinacione të mëtejshme të dakorduara”, tha një zëdhënës i Departamentit të Shtetit të martën për Zërin e Amerikës. “Ne gjithashtu përsërisim pritshmërinë tonë të qartë që talebanët të sigurojnë që toka afgane të mos përdoret për të kërcënuar ndonjë vend tjetër dhe të lejojë qasje humanitare në mbështetje të popullit afgan. Bota po shikon nga afër”, tha ai më tej.
Talibanët shpallën të martën një qeveri islamike “kujdestare”, duke thënë se ajo do të drejtohet nga Mullah Hasan Akhund, një bashkëpunëtor i ngushtë i themeluesit të ndjerë të lëvizjes islamike, Mullah Omar.
Njoftimi erdhi një ditë pasi talebanët deklaruan se kishin pushtuar provincën veriore të Panjshir, duke i dhënë fund rezistencës së vetme të armatosur ndaj sundimit të tyre në vendin e shkatërruar nga konflikti.
Ndërsa ndante detajet e kabinetit të përkohshëm në një konferencë shtypi në Kabul, zëdhënësi kryesor i talebanëve Zabihullah Mujahid tha se të gjitha emërimet ishin në një detyrë ushtruese dhe se krerët e ministrive të ndryshme të tjera do të emërohen së shpejti.
Mullah Abdul Ghani Baradar, kreu i zyrës politike të grupit, do të shërbejë si zëvendëskryeministër në qeverinë e përkohshme. Sirajuddin Haqqani do të jetë ministër i brendshëm; Amir Khan Muttaqi do të jetë ministër i jashtëm; dhe Mohammad Yaqoob, i biri i Omarit, do të jetë ushtruesi i detyrës së ministrit të mbrojtjes, shtoi Mujahid.
Haqqani është kreu i rrjetit “Haqqani”, i caktuar nga Shtetet e Bashkuara si një organizatë terroriste globale. Uashingtoni ka ofruar një shpërblim prej 10 milionë dollarësh për informacionin që çon në arrestimin e tij nën akuzat për drejtimin e sulmeve vdekjeprurëse kundër forcave amerikane dhe aleate në Afganistan. SHBA denoncon rrjetin Haqqani si “grupi kryengritës më vdekjeprurës dhe më i sofistikuar.
