Analisti Arjan Curi, në një intervistë për “Top Story”, deklaroi se ka marrë kërcënime të rënda pas shpalljes së një pohimi që implikonte politikanin Behgjet Pacolli në vrasjen e Liridona Ademajt nga bashkëshorti i saj, Naim Murseli.
“Ne patëm guximin të themi në këtë emision atë që mediat e Kosovës, por edhe njerëz që janë brenda qarqeve të larta politike në Kosovë, e pëshpërisnin me njëri-tjetrin, por asnjëri nuk kishte guxim ta thoshte. Naim Murseli, për shkak të të qenit këshilltar i Behgjet Pacollit, ka qenë edhe në Mar-a Lago, në vilën e Donald Trump.
Ky njeri që arriti të kalojë të gjithë filtrat e sigurisë së një shteti, arrin dhe bën këtë krim makabër, për shkak të një tradhtie bashkëshortore dhe një trekëndëshi bashkëshortor, që kur unë e thashë këtu në emision këtë, kam marrë kërcënime të tmerrshme. Ta dinë dhe ata që po na dëgjojnë, që nuk na mbyllin dot gojën, as me kërcënime, as me gjykata, sepse vetëm në Rusinë e Behgjetit mund të dënohen njerëzit për opinione, në asnjë vend tjetër të botës nuk ndodh kjo”.
Curi theksoi se ky informacion mund të lidhet me një lidhje jashtëmartesore të Naim Murselit, duke sugjeruar se një person i tretë mund të kishte ndërhyrë në marrëdhënien e çiftit, duke ndikuar në tragjedinë.
“Jam i drejtë dhe kam pritur që tezat të vërtetoheshin edhe nga aktakuza. Pas fjalës ‘çrregullime të rënda të marrëdhënies martesore’, fshihet një trekëndësh dashurie. Në nuk futemi në krevatin e një njeriu, por nëse ky krevat bëhet më pas shkak për një vrasje, atëherë do të futemi. Prokuroria duhet ta thotë kush është personi i tretë që është futur mes çiftit. Ne nuk e dimë nëse personi ka pasur rol aktiv apo pasiv në shtyrjen e Naim Murselit të bëjë vrasjen”.
Ai theksoi se Prokuroria ka detyrimin të zbardhë nëse ekziston një person tjetër që ka pasur rol në këtë ngjarje dhe nëse ai ka ndikuar në vendimin e Murselit për të kryer vrasjen e gruas së tij.
