Prej ditës së djeshme e gjithë vëmendja mediatike ka qenë e drejtuar në qytetin e Fierit, më konkretisht në gjimnazin “Janaq Kilica”.
Ditën e djeshme mbi 30 nxënës janë dërguar me shenja të rënda helmimi në spital, pasi janë ndjerë keq gjatë orëve të mësimit dhe dyshohet se janë helmuar nga një spraj, që lëshohet në ajër.
Helmohen sërish gjimnazistët e Fierit, 30 prej tyre përfundojnë në spital
Ndërkohë ditën e sotme është parë një ambulancë në ambientet e shkollës dhe dyshimet e para kanë qenë se një tjetër nxënëse është helmuar.
Mirëpo, ajo që bëri bujë të madhe mediatike është reagimi i Drejtoreshës së Drejtorisë Arsimore të Fierit, Yllka Beci, e cila pasi shkoi me urgjencë në ambientet e shkollës, nuk ngurroi ta shprehte versionin e saj përpara kamerave.
Në mes të kaosit të krijuar, drejtoresha tha se vajzës i kishin rënë të fikët ngaqë ishte shtatzënë.
“Të lutem a mund të të të them diçka pa kamera ty, si nënë dhe si grua? A mund të të them diçka? Me kamera do ta them, vajza është shtatzënë, pati probleme dhe e nisëm në spital. Çfarë ka mo? Po është shtatzënë. ”, u shpreh drejtoresha, duke tentuar të hedhë poshtë versionin e helmimit të tretë brenda 1 jave në shkollën e mesme të qytetit.
Mirëpo më pas në një komunikim me emsionin “Shqipëria Live”, drejtoresha tha se termi vajzë është përdorur për një mësuese dhe më tej ajo shtoi se prindërit e nxënësve kanë ushtruar një presion të madh ndaj saj.
Së fundmi, ka reaguar edhe ministrja e Arsimit Sportit dhe Rinisë, Besa Shahini , e cila me anë të një statusi në Facebook shkruan se të gjitha janë një sajesë nga Partia Demokratike.
Më tej ministrja bën me dije se opozita krijoi kaos për të dëmtuar punën e mirë që po bëhet nga drejtuesit e shkollës, teksa vijon duke thënë se gjimnazi “Janaq Kilica” do riparohet falë mbështetjes së kreut të Bashkisë Fier, Armando Subashi.
NJOFTIMI I PLOTË
Sapo u dakordësuam me Kryetarin e Bashkisë Fier për të ndërhyrë edhe në godinën e vjetër të shkollës së mesme “Janaq Kilica”, që ta sjellim në gjendjen e godinës së re, pra në gjendjen të cilën meriton shkolla qendrore e Fierit.
Nuk do të lejojmë që ngjarje të manipuluara politikisht për të shkaktuar kaos të dëmtojnë punën e mirë që bëhet në atë shkollë prej shumë e shumë vitesh. Kemi shtuar oficerët e sigurisë dhe prezencën e psikologut në shkollë, në mënyrë që të mbështesim drejtoren e cila po bën një punë të mirë në organizimin e shkollës.
Ankesat për ndërhyrje politike në shkollë po i hulumtojmë me kujdes dhe do të marrim masa që të sigurohemi se tensionet politike të stisura nga opozita jashtë-parlamentare mos të ndikojnë punën e rëndësishme shkollore.
