Bota ka humbur personin më të vjetër, murgeshën braziliane Inah Canabarro Lucas, e cila ndërroi jetë në moshën 116-vjeçare në Porto Alegre të Brazilit, ku jetonte në një shtëpi të komunitetit fetar të Motrave Teresiane.
E lindur më 8 qershor 1908 në shtetin Rio Grande do Sul, Motra Inah iu kushtua jetës fetare dhe ia atribuoi jetëgjatësinë besimit të saj tek Zoti, duke thënë se “Ai është sekreti i jetës”. Në vitin 2018, ajo mori bekimin nga Papa Françesku.
Njohur për karakterin e saj të qetë, humorin dhe dashurinë për futbollin, Inah ishte një adhurues i pasionuar i ekipit brazilian Sport Club Internacional.
Ajo festonte çdo vit ditëlindjen me një tortë në formën e stadiumit të ekipit të saj të zemrës dhe në 116-vjetorin e saj u shfaq me shallin e Internacional.
Klubi sportiv i shprehu ngushëllimet, duke e përshkruar jetën e saj si një shembull të mirësisë, besimit dhe dashurisë për sportin.
Sipas të afërmve dhe murgeshave, Inah nuk kishte vuajtur nga sëmundje serioze dhe ruajti një shëndet të mirë deri në fund, pavarësisht problemeve me shikimin dhe dëgjimin në vitet e fundit.
Ajo ka kryer vetëm një operacion në jetën e saj një operacion katarakti në moshën 106 vjeçare.
Jetesa e saj ishte e rregullt dhe e disiplinuar, duke u zgjuar, ngrënë, lutur dhe fjetur çdo ditë në të njëjtën orar.
Pas ndarjes nga jeta të Motrës Inah, titulli i personit më të vjetër të gjallë tani i kalon Ethel Caterham, 115-vjeçares nga Surrey, Angli.
