Në gjithë Italinë sot është mbajtur një minutë heshtje për viktimat e shkaktuara nga COVID-19.
Iniciativa ishte e kryetarëve të bashkive dhe më pas u përhap në institucione të tjera.
Sipas mediave italiane, ceremonia nisi në orën 12:00.
Në të gjitha ndërtesat publike, flamuri italian u ul në gjysmështizë.
Të gjitha institucionet ndërkohë ndaluan punën dhe mbajtën një minutë heshtje.
Pjesë e iniciativës u bë Presidenca dhe më pas selia e shenjtë në Vatikan.
“Sot, në solidaritet me Italinë, Selia e Shenjtë do të ulë flamujt e tyre në gjysmën shtizë duke mbajtur zi, dhe duke shprehur ngushëllimet tona për viktimat e pandemisë në Itali dhe në botë, për familjet e tyre dhe atyre që përpiqen kaq shumë ta mposhtin këtë virus”, thuhej në deklaratën e Vatikanit.
Aktualisht në Itali janë regjistruar rreth 102 mijë raste, nga të cilët numërohen 11.591 viktima dhe 14.620 të shëruar.
Italia është vendi me numrin më të lartë të vdekshmërisë nga koronavirusi, duke ia kaluar dhe Kinës.
Tre ditë më parë, qeveria shqiptare dërgoi 30 mjekë e infermierë në Itali, për t’u ardhur në ndihmë mjekëve italianë.
