Teksa po bëhet një javë nga tërmeti shkatërrues në Turqi, bilanci i viktimave është alarmant. Deri më tani raportohet për 36 mijë jetë të humbura në Turqi dhe Siri si pasojë e lëkundjeve fatale. Në Turqi bilanci i të vdekurve është 31.643 persona ndërsa në Siri raportohet për 4574 jetë të humbura. Ndërkohë edhe pse ka kaluar një javë nga tërmeti me pasoja tragjike, ekipet e kërkim-shpëtimit vazhdojnë misionin e tyre për të nxjerrë nga rrrënojat të mbijetuarit dhe trupat e viktimave.
Duhet të theksojmë se në vendin tonë, ditë e sotme (e hënë, 13 shkurt 2023) është shpallur nga qeveria si Ditë Zie Kombëtare, në shenjë solidarizimi me të dyja shtetet që po përballen me pasojat e një fatkeqësie natyrore.
Dorëzimi i furnizimeve urgjente në zonat e goditura nga tërmeti në veri të Sirisë është komplikuar nga një luftë civile e gjatë midis forcave opozitare dhe qeverisë siriane, të udhëhequr nga presidenti Bashar al-Assad, i cili akuzohet për vrasjen e njerëzve të tij.
Ambasadorja e SHBA në Kombet e Bashkuara Linda Thomas-Greenfield i kërkoi të dielën Këshillit të Sigurimit të OKB-së të miratojë dy pika shtesë aksesi për të ofruar ndihma në pjesët e Sirisë të goditura nga tërmeti vdekjeprurës javën e kaluar.
“Njerëzit në zonat e prekura po mbështeten tek ne. Ata po i bëjnë thirrje njerëzimit për të ndihmuar në momentin e tyre të nevojës”, tha Thomas-Greenfield në një deklaratë.
