Në spitalin COVID 1 duket se situata po normalizohet në lidhje me numrin e të shtruarëve.
Po gjithsesi, numri i viktimave vazhdon të jetë në shifra të larta.
“News 24” raporton se që prej mëngjesit të sotëm e deri më tani në urgjencë janë paraqitur 3 raste urgjence me Covid-19.
Duke iu referuar edhe shifrave të tetorit të vitit të kaluar, ka një trefishim të rasteve të fataliteteve. Vetëm në 3 ditët e fundit kanë ndërruar jetë 29 persona. Aktualisht në spital ndodhen të shtruar 146 pacientë.
Po ashtu “News 24” raporton se në mesin e personave të shtruar në gjendje të rënduar, por fatmirësisht jashtë rrezikut, është një grua lehonë, e cila solli pak ditë më parë në jetë 2 binjakë. Lindja u krye me operacion për shkak të gjendjes shëndetësore të nënës, ndërkohë që fëmijët gëzojnë shëndet të mirë. Në spitalin infektiv e shtruar është edhe një 21-vjeçare shtatzënë, ndërkohë që gjendja e saj është e rënduar, por e qëndrueshme.
Kujtojmë që një pjesë e popullsisë janë të vaksinuar, ndërkohë që Ministria e Shëndetësisë ka përcaktuar target grupin të cilët do të bëjnë edhe dozën e tretë të vaksinës, duke e konsideruar si një mbrojtje shtesë kundër Covid-19.
Aplikimi i dozës së tretë të vaksinës anti-Covid në popullatën mbi 60 vjeç dhe personat me disa sëmundje kronike do të nisë aplikimin brenda Tetorit.
