Papa Françesku ka ndërruar jetë mëngjesin e sotëm, më 21 prill 2025, në moshën 88-vjeçare.
Lajmi u konfirmua nga Vatikani në një deklaratë zyrtare, duke bërë me dije se kreu i Kishës Katolike ndërroi jetë në rezidencën e tij në Casa Santa Marta.
“Me dhimbje të thellë njoftojmë se Ati i Shenjtë Françesku u kthye në shtëpinë e Atit në orën 07:35 të mëngjesit,” thuhej në deklaratë.
Ai u përshkrua si një shërbestar i përulur i Zotit, që jetoi me përkushtim të plotë ndaj Ungjillit dhe më të varfërve.
Edhe pse nuk arriti të lexonte vetë mesazhin e Pashkëve për shkak të gjendjes së rënduar shëndetësore, Papa u shfaq në ballkonin e Bazilikës së Shën Pjetrit një ditë më parë, ku i bekoi të pranishmit dhe përsëriti thirrjen për armëpushim në Gaza.
Kush ishte Papa Françesku
I lindur më 17 dhjetor 1936 në Buenos Aires, Argjentinë, Jorge Mario Bergoglio ishte papa i parë nga Amerika Latine dhe i pari jezuit që u zgjodh në krye të Kishës Katolike.
Ai u shugurua prift në vitin 1969, ndërsa në vitin 1998 u emërua kryepeshkop i Buenos Aires, për t’u bërë kardinal tre vite më vonë. Pas dorëheqjes së Papa Benediktit XVI në vitin 2013, Bergoglio u zgjodh Papë më 13 mars të po atij viti, duke marrë emrin “Françesku”, në nder të Shën Françeskut të Asizit.
Gjatë papatit të tij, Françesku u dallua për thjeshtësinë, reformën e Kurisë Romake, mbrojtjen e të varfërve dhe kujdesin për mjedisin. Ai jetoi në bujtinën Domus Sanctae Marthae, në vend të apartamenteve papale, duke refuzuar luksin tradicional të Vatikanit.
Françesku dha rol më të madh për gratë në strukturat drejtuese të Kishës dhe ndërmori hapa të guximshëm për të afruar komunitetet LGBTQ, duke mbështetur bekimet individuale për ta, jashtë kontekstit liturgjik.
Françesku nuk hezitoi të kritikonte kapitalizmin e shfrenuar dhe konsumizmin global, ndërsa ndryshimi i klimës u bë një nga temat kyçe të papatit të tij.
Në vitin 2022, ai kërkoi falje për përfshirjen e Kishës Katolike në “gjenocidin kulturor” ndaj popujve indigjenë në Kanada, një akt që u vlerësua gjerësisht. Po ashtu, ai mblodhi Sinodin mbi Sinodalitetin, që u cilësua si ngjarja më e rëndësishme në Kishë që nga Këshilli i Dytë i Vatikanit.
Gjatë viteve të fundit, shëndeti i Papa Françeskut u përkeqësua dukshëm. Në fillim të vitit 2025, ai u shtrua në spital për shkak të bronkitit dhe më pas u diagnostikua me pneumoni bilaterale dhe dështim të pjesshëm të veshkave.
Ai kaloi 38 ditë në spital, ku iu nënshtrua trajtimeve intensive. Pavarësisht përmirësimeve të përkohshme, gjendja e tij mbeti komplekse.
Më 23 mars, ai u rikthye në Vatikan pas një qëndrimi të gjatë në spital, duke u përshëndetur nga turma jashtë spitalit Gemelli. Mjekët e tij vazhduan ndjekjen e gjendjes së tij me terapi të vazhdueshme për infeksionin në mushkëri dhe probleme të tjera shëndetësore.
Papa Françesku la pas një trashëgimi të pasur me reforma, deklarata të guximshme dhe një përpjekje të vazhdueshme për ta bërë Kishën më afër njerëzve të thjeshtë. Ai konsiderohet një nga figurat më të rëndësishme morale të shekullit XXI, që e drejtoi Kishën në një periudhë sfiduese dhe transformuese.
Vatikani pritet të njoftojë në ditët në vijim detaje për ceremonitë mortore dhe hapjen e konklavës për zgjedhjen e Papës së ri.
