Një protestë është paralajmëruar sot në orën 13:00 në parkun e qytetit të Koçanit në Maqedoninë e Veriut, vetëm një ditë pas aksidentit tragjik ku humbën jetën 59 persona.
Thirrja për protestën po shpërndahet gjerësisht në rrjetet sociale, ndërsa organizatorët theksojnë se tubimi është shprehje e dhimbjes dhe revoltës qytetare. Në një postim të shpërndarë në faqen e Facebook-ut “Koçani (Zëri i Koçanit)”, organizatorët shprehen:
“Kjo protestë është shprehje e dhimbjes dhe revoltës së thellë për jetët e humbura, por edhe për gjendjen në të cilën ndodhemi si shoqëri. Ne nuk mund t’i kthejmë bashkëqytetarët tanë të dashur, por jemi të detyruar të luftojmë për nder të tyre dhe që ta ndryshojmë këtë sistem joefikas që nuk na ofron siguri, mirëqenie dhe drejtësi.”
Ndërkohë, qeveria e Maqedonisë së Veriut ka shpallur shtatë ditë zie kombëtare. Sot, flamujt në të gjithë vendin janë ulur në gjysmë shtizë për të nderuar viktimat.
Paraditen e sotme po zhvillohen edhe seancat për caktimin e masës së sigurisë ndaj të dyshuarve në rastin e zjarrit në diskotekën e Koçanit në Maqedoninë e Veriut.
Njoftimi është bërë nga Prokuroria Publike në Maqedoninë e Veriut. Për rastin deri më tani janë marrë në pyetje mbi 20 persona, ndërsa për 11 Prokuroria ka nisur procedurën hetimore.
Për 8 prej tyre tashmë është bërë propozim për ndalim afatshkurtër, ndërsa 3 të tjerët janë ende të shtruar në shtruar në spital dhe janë në gjendje të rëndë shëndetësore.
