Një ditë para nisjes së punimeve për Parlamentin e ri, kreu i Partisë Demokratike ka mbldhur kryesinë dhe drejtuesit politikë nëpër qarqet e vendit.
Mësohet se tema kryesore e diskutimit ka qenë koordinimi i PD-së ditën e nesërme në Parlament.
Ndërkohë, mësohet se diskutime ka pasur edhe për ish-kryeministrin Sali Berisha, i cili është shpallur “non-grata” nga Shtetet e Bashkuara të Amerikës dhe këto të fundit kanë kërkuar që ai të mos jetë pjesë e Kuvendit. Gjithsesi në lidhje me këtë çështje nuk pritet të ketë vendimmarrje.
Kujtojmë që ish-kreu i PD, Sali Berisha e ka konfirmuar vazhdimisht se do të jetë pjesë e Parlamentit, pasi është zgjedhur për të qenë deputet nga populli.
Ndërkohë, pritet që para seancës së nesërme të mblidhet edhe grupi parlamentar.
Partia Demokratike kthehet në Parlament dy vite pasi në shkurt të 2019-ës dogji mandatet e deputetëve dhe vendosi të ishte jashtë institucioneve parlamentare. Edhe këtë herë PD do të rikthehet në Parlament si opozitë, pas humbjes në zgjedhjet e 25 prillit. Kujtojmë që PS arriti të fitonte shumciën e votave, duke siguruar 74 mandate. Partia Demokratike nga ana tjetër, arriti të siguronte vetëm 59 mandate, ndërsa 4 mandate i siguroi Lëvizja Socialiste për Integrim dhe 3 PSD e Tom Doshit.
