Ditën e sotme nëna e të miturit ka kallëzuar në polici një person tjetër që mendon se është e përfshirë në vrasjen e të birit.
Klodian Çalamani dyshohet se nuk ishte i vetëm në vrasjen makabre të 8-vjeçarit Mateo Vasliu një javë më parë.
Mësohet se familjarët e djalit, përkatësisht nëna dhe dy të afërme të familjes kanë denoncuar duke hedhur akuza se një grua, e afërme e familjes, mund të ketë dijeni mbi ngjarjen dhe këtë e bazojnë në disa qëndrime të saj gjatë gjithë këtyre ditëve.
Nëna e Mateos ka kallëzuar një grua të moshuar, e cila pretendohet se ka dhënë të njëjtën dëshmi me vrasësin para arratimit të 38-vjeçarit duke treguar me detaje krimin.
Mësohet se e moshuara është e afërmja e familjes dhe banon pranë banesës së Klodian Çalamanit. Në momentin e marrjes në pyetje nga Policia, pa u arrestuar ende Çalamani, ajo ka treguar lëvizjet e 8-vjeçarit, por ndryshoi fundin e historisë. E moshuara pretendoi se pasi Mateo i kishte dërguar bukën 38-vjeçarit kishte dalë sërish, e pranë tij kishte kaluar një makinë e kuqe, e cila sipas tyre mund të kishte lidhje me zhdukjen e 8- vjeçarit”.
E moshuara do të merret në pyetje në vijim për të verifikuar dyshimet e familjarëve të 8-vjeçarit të vrarë dhe për të hedhur dritë mbi ngjarjen. Ndërkohë që nga ana tjetër Klodian Çalamani qëndron i izoluar në paraburgimin e Vlorës ku nuk ka kontakte me asnjë person, ndërsa jashtë vazhdon mbledhja e firmave për të rikthyer dënimin me vdekje, nismë që deri më tani i janë bashkuar mijëra qytetarë.
