Presidenti Ilir Meta e ka nisur mëngjesin e sotëm me dy postime në rrjetin social Facebook, ku ka dashur të sqarojë reformat e ndryshme që u shndërruan në “Ramaforma”.
Këtë etiketim, presidenti Meta e shfaqi hapur ditën e djeshme në konferencën e mbajtur para mediave, ku kritikoi ashpër kryeministrin Rama dhe ambasadorët e deleguar në Shqipëri.
Meta e nis me Reformën në Drejtësi, ku 90% e shqiptarëve e patën domosdoshmëri për t’i dhënë fund korrupsionit dhe për të rritur besimin te sundimi i ligjit.
Presidenti Meta e quan me ironi Ramën “timonier artist”, por Meta është shprehur se “Ramaforma” do të jetë një ciklë i gjatë, shpjegues dhe çtensionues.
“Reforma në Drejtësi me të drejtë u vlerësua nga mbi 90% e qytetarëve si domosdoshmëri ulëritëse për t’i dhënë fund korrupsionit dhe pandëshkueshmërisë, si dhe për të rritur besimin te sundimi i ligjit. Shumë misione ekspertësh ndërkombëtarë u angazhuan dy vite para miratimit të saj në Kuvend dhe shumë programe financimi vazhdojnë edhe sot.
Por baza e konsensusit të arritur ishin vetëm rekomandimet e Komisionit të Venecias, që është institucioni më prestigjioz në Europë dhe i pranuar nga të gjitha palët, brenda vendit por dhe nga partnerët ndërkombëtarë. Për këtë Reformë u angazhuan profesorët më të mirë të Europës në të drejtën kushtetuese, të cilët bënë një punë të shkëlqyer për të garantuar një sistem drejtësie të pavarur dhe të pakapur nga politika.
Profesionalizmi dhe paanësia e tyre garantoi konsensusin historik me 140 vota, duartrokitje dhe puthje të papërmbajtshme. Pra Reforma në Drejtësi u bazua te Komisioni i Venecias. Po Ramaforma ku bazohet?!! Përsëri frymëzimi buron nga Venecia, por jo nga Komisioni, por nga Bienalja e Venecias. Pse? Sepse timonieri ynë është vetëm Artist”, shkruan Meta në rrjetin social.
Ju të gjithë e dini arritjen më të freskët të Ramaformës në Drejtësi, pikërisht momentin kur Kolegji Zgjedhor duke shqyrtuar hallin e Idajetit trukoi se kishte rrëzuar Dekretin e Presidentit. Pas pak fillojmë me sqarimin e momentit historik të ndryshimit cilësor nga Reformë në Ramaformë. Ky do të jetë një cikël i gjatë, shpjegues dhe çtensionues. Pasi të përfundojmë me Ramaformën në Drejtësi, do vijojmë me Ramaformat në të gjitha fushat e jetës”, shton Presidenti në postimin e tij.
