Ndërsa na ndajnë vetëm pak orë nga çelja zyrtare e fushatës elektorale, dy partitë e mëdha kanë nisur punimet në dy sheshet kryesore në Tiranë.
Tubimi i Partisë Socialiste do të zhvillohet në Sheshin “Skënderbej” në orën 18:00. Kryetari i Bashkisë Erion Veliaj, ka dhënë detaje të reja, ndërsa tha se tubimi i PS do të jetë digjital dhe do të ketë disa të ftuar special nga persona që i janë bashkuar PS së fundmi.
Më tej Veliaj shtoi se ndjekësit do të jenë online, duke e cilësuar zhvillimin e sotëm si një eksperiencë unike.
“Mbështetësit tanë do të logohen online dhe fushata do jetë e bazuar në komunikim digjital. Do ketë qindra e mijëra komunikime me 10 veta e ruhet komunikimi qytetar. Do jetë eksperiencë unike.”, është shprehur ai.
Nga ana tjetër, Partia Demokratike ka nisur punën ndërkohë për përgatitjet në Sheshin “Nënë Tereza”. Tubimi pritet të zhvillohet në orën 17:00, një orë para se të zhvillohet takimi elektoral i PS.
Teksa na ndajnë shumë pak orë nga nisja zyrtare e fushatës, në këtë shesh po vendosen elementët e fundit. Tre tabela me sloganin “Shqipëria fiton”, “Bashkë për ndryshim” dhe “Voto 9, Partia Demokratike”.
Gjithashtu në hyrje është vendosur një portë blu, ku shkruhet “Fitorja nis këtu”, podium me ngjyrat e flamurit dhe dhjetëra prozhektorë.
Kujtojmë se këto zgjedhje priten të jenë risi, pasi për herë të parë po zhvillohen në kushte të pazakonta pandemie.
