Pasi e ka akuzuar si bashkëpunëtor të ish-Sigurimit të Shtetit, ish-presidenti Bujar Nishani ka vazhduar sot sulmin ndaj ish-deputetit Romeo Gurakuqi. Ish-anëtar i Komisionit të Verifikimit të kandidatëve për deputetë në PD shkruan se para zgjedhjeve të vitit 2017, Romeo Gurakuqi i shkruante SMS dhe i kërkonte ndihmë pasi punëdhënësi i tij Henri Çili, i kërkonte që të shante në media Sali Berishën.
“Por Romeo i 2017-s, ka një dallim prej tyre. Romeo është edhe burracak, frikacak e zvarranik, nuk i del shpifjes ballazi! Para zgjedhjeve të vitit 2017, Romeo më dërgonte SMS, ku kërkonte ndihmë se (sipas Romeos) punëdhënësi i tij, H. Çili i kërkonte me ngulm që Romeo të sulmonte e shante në media Sali Berishën”, shkruan Nishani.
Nishani i kujton edhe zgjedhjet e 2017-s, ku Romeo Gurakuqi udhëhiqte listën elektorale të PD në Shkodër.
“Por në 2017, Romeos ju dha një mundësi e artë dhe vlerësim maksimal duke e vendosur të udhëheq listën elektorale të Partisë Demokratike në Shkodër. Këtë besim, Romeo e shndërroi në dështimin dhe rezultatin elektoral më skandaloz dhe poshtërues për Partinë Demokratike në Shkodër gjatë gjithë historisë së pluralizmit shqiptar”, deklaron Nishani.
Ndërkaq Bujar Nishani i thotë Gurakuqit se ka pasur dy pseudonime në dosjet e Sigurimit të Shtetit.
“Si një ish Ministër i Brendshëm, do t’i sugjeroja Romeos 2017 të kërkonte e lexonte në arkivin e Sigurimit të Shtetit (në Ministrinë e Brendshme) kartelën Nr. 379, të datës 08.01.1949, të rekrutimit të “SATELITIT” prej oficerit të sigurimit, Anastas Bojaxhi dhe kartelen Nr. 2641 të datës 27.02.1980, të rekrutimit të “VIGJILENTIT”, prej oficerit të sigurimit, Selfo Islami”, shkruan Nishani.
Pas akuzës së Nishanit, ka reaguar Romeo Gurakuqi i cili e mohon të ketë qenë bashkëpunëtor i Sigurimit.
“Nen pergjegjesi publike dhe ligjore deklaroj se as une dhe asnje anetar i familjes sime, nuk ka qene kurre as bashkepunetor i ish- Sigurimit dhe as anetar i PPSH”.
Gurakuqi postoi edhe foton e vërtetimit nga Autoriteti për Informim mbi dosjet e ish-Sigurimit të Shtetit ku thuhet se nuk ka dosje për të.
/Gazetareforma.com/
